കൊച്ചി: നിയമസഭാ തിരഞ്ഞെടുപ്പ് തീയതി പ്രഖ്യാപിക്കും മുൻപേ കൊച്ചി മണ്ഡലത്തില്‍ സ്‌ഥാനാര്‍ഥിയെ പ്രഖ്യാപിച്ച് വിഫോർ പീപ്പിൾസ് പാർട്ടി. വി ഫോർ കേരളയുടെ ക്യാംപെയിൻ കോ–ഓർഡിനേറ്റർ നിപുൺ ചെറിയാനായിരിക്കും കൊച്ചിയിലെ സ്ഥാനാര്‍ഥി. ഉൽഘാടനത്തിന് മുൻപേ വൈറ്റില മേൽപ്പാലം തുറന്ന് കൊടുത്ത സംഭവത്തിലൂടെ വിവാദങ്ങളിൽ ഇടം നേടിയ വ്യക്‌തിയാണ്‌ നിപുൺ ചെറിയാൻ.
വിഫോർ കൊച്ചി എന്ന പേരില്‍ തദ്ദേശ തിരഞ്ഞെടുപ്പില്‍ കൊച്ചി കോര്‍പറേഷനില്‍ കാഴ്‌ച വച്ച മികച്ച പ്രകടനത്തിൽ നിന്ന് പ്രചോദനം ഉൾക്കൊണ്ടാണ് ഇവർ പുതിയ പാർട്ടി രൂപീകരിച്ച് മൽസര രംഗത്തേക്ക് ഇറങ്ങുന്നത്. മറ്റ് പാർട്ടികൾ സ്‌ഥാനാർഥി ചർച്ചകൾ ആരംഭിക്കാൻ ഇരിക്കെയാണ് വി ഫോർ പീപ്പിൾസ് പാർട്ടി നിപുൺ ചെറിയാന്റെ സ്‌ഥാനാർഥിത്വം നേരത്തെ പ്രഖ്യാപിച്ചത്.
കൊച്ചി മണ്ഡലത്തിന്‍റെ ഭാഗമായ കോര്‍പറേഷന്‍ ഡിവിഷനുകളില്‍ പതിമൂന്ന് ശതമാനത്തിലധികം വോട്ടാണ് സംഘടന നേടിയത്. ഇതേ നേട്ടം നിയമസഭാ തിരഞ്ഞെടുപ്പിലും ആവർത്തിക്കാമെന്ന പ്രതീക്ഷയിലാണ് അവർ. കൊച്ചിക്ക് പുറമേ എറണാകുളം, തൃക്കാക്കര, തൃപ്പൂണിത്തുറ മണ്ഡലങ്ങളിലും മല്‍സരിക്കുമെന്ന് വിഫോർ പീപ്പിൾസ് പാർട്ടി പ്രഖ്യാപിച്ചിട്ടുണ്ട്. സമാന ചിന്താഗതിയുള്ള സംഘടനകളുമായി ചേര്‍ന്ന് കേരളമൊട്ടാകെ പ്രവര്‍ത്തനം വ്യാപിപ്പിക്കുമെന്നും അവർ പറയുന്നു.
Read Also: എല്‍ഡിഎഫ് വിടണമെന്ന് മാണി സി കാപ്പന്‍; എന്‍സിപിയില്‍ ആഭ്യന്തര കലഹം രൂക്ഷം
