തിരുവനന്തപുരം: മുഖ്യമന്ത്രിയുടെ ജില്ലാതല സമ്പര്‍ക്ക പരിപാടി എന്‍എസ്എസ് ബഹിഷ്‌കരിച്ചു. തങ്ങളുടെ ആവശ്യങ്ങളോട് സര്‍ക്കാര്‍ മുഖം തിരിഞ്ഞ് നില്‍ക്കുന്നുവെന്ന് ചൂണ്ടിക്കാട്ടിയാണ് ബഹിഷ്‌കരണം. മുഖ്യമന്ത്രിക്കൊപ്പം രാവിലെ 8.30ന് പ്രാതലിനുള്ള ക്ഷണമാണ് നിരസിച്ചത്.
എന്‍എസ്എസിന്റെ ആവശ്യങ്ങള്‍ സര്‍ക്കാര്‍ പരിഗണിക്കാത്തതു കൊണ്ടാണ് ബഹിഷ്‌കരണമെന്ന് കൊല്ലം താലൂക്ക് യൂണിയന്‍ പ്രതികരിച്ചു. മുന്നോക്ക സംവരണം നടപ്പിലാക്കുന്നതില്‍ സര്‍ക്കാര്‍ വീഴ്‌ച വരുത്തിയെന്നും മന്നം ജയന്തി അവധിയായി പ്രഖ്യാപിക്കണം എന്ന ആവശ്യം നടപ്പിലാക്കിയില്ലെന്നുമാണ് എന്‍എസ്എസിന്റെ ആരോപണം. ദേവസ്വം ബോര്‍ഡിന്റെ നടത്തിപ്പിലുള്ള അതൃപ്‌തിയും എന്‍എസ്എസ് രേഖപ്പെടുത്തി.
എന്‍എസ്എസ് കൊല്ലം താലൂക്ക് യൂണിയന്‍ പ്രസിഡണ്ടിനെയാണ് മുഖ്യമന്ത്രിയുടെ ജില്ലാതല സമ്പര്‍ക്ക പരിപാടിയിലേക്ക് ക്ഷണിച്ചിരുന്നത്. സർക്കാർ മുന്നോക്ക സംവരണം നടപ്പാക്കിയതിന് പിന്നാലെ മുന്‍കാല പ്രാബല്യത്തോടെ സംവരണം നടപ്പിലാക്കണമെന്ന് നേരത്തെ എന്‍എസ്എസ് ജനറല്‍ സെക്രട്ടറി സുകുമാരന്‍ നായര്‍ ആവശ്യപ്പെട്ടിരുന്നു.
Also Read: എസ്എസ്എല്‍സി, പ്ളസ് ടു പരീക്ഷകള്‍; സിലബസ് വെട്ടിച്ചുരുക്കില്ല, പകരം ഓപ്ഷനുകള്‍
