തൃശൂർ: സംസ്‌ഥാന സർക്കാരിന്റെ കഴിഞ്ഞ അഞ്ച് കൊല്ലത്തെ പ്രവർത്തനത്തിൽ എൽഡിഎഫിന് പൂർണ സംതൃപ്‌തിയെന്ന് മുഖ്യമന്ത്രി പിണറായി വിജയൻ. മുന്നോട്ട് പോകാനുള്ള ആത്‌മവിശ്വാസമുണ്ടെന്നും അദ്ദേഹം പറഞ്ഞു. നിയമസഭാ തിരഞ്ഞെടുപ്പ് അടുത്തിരിക്കെ നിലവിൽ സർക്കാർ പ്രകടന പത്രിക തയാറാക്കാനുള്ള നടപടിയുമായി മുന്നോട്ട് പോകുകയാണെന്നും അദ്ദേഹം അറിയിച്ചു. കേരള പര്യടനത്തിന്റെ ഭാഗമായി തൃശൂരിൽ എത്തിയ മുഖ്യമന്ത്രി മാദ്ധ്യമങ്ങളോട് സംസാരിക്കുകയായിരുന്നു.
ഭരണം ഏറ്റെടുക്കുന്നതിന് മുമ്പ് കേരളത്തിലെ ജനങ്ങൾക്ക് മുന്നിൽ ചെയ്യാനുദ്ദേശിക്കുന്ന കാര്യങ്ങൾ സർക്കാർ പ്രകടന പത്രികയിലൂടെ അവതരിപ്പിച്ചു. അതിൽ പറഞ്ഞ കാര്യങ്ങൾ പൂർത്തിയാക്കാൻ സാധിച്ചു എന്ന സംതൃപ്‌തിയാണ് സർക്കാരിനുള്ളത്. എന്നാൽ, ഇനിയുള്ള കാലയളവിൽ നിയമസഭാ തിരഞ്ഞെടുപ്പിന് ശേഷം എൽഡിഎഫ് എന്തൊക്കെ നടപ്പിലാക്കാൻ ആഗ്രഹിക്കുന്നു എന്നുള്ള കാര്യങ്ങൾ സ്വാഭാവികമായും തയാറാക്കാനുണ്ട്.
പ്രകടന പത്രിക തയാറാക്കാൻ നേരത്തെ സ്വീകരിച്ച മാർഗങ്ങൾ ഇതുപോലെയുള്ള യോഗങ്ങൾ ചേർന്ന് വിവിധ തുറകളിലുള്ള അഭിപ്രായങ്ങൾ ശേഖരിക്കലാണ്. നവ കേരളം സൃഷ്‌ടിക്കുക എന്ന ലക്ഷ്യത്തോടെയാണ് ഇപ്പോൾ നാം പ്രവർത്തിക്കുന്നതെന്ന് മുഖ്യമന്ത്രി പറഞ്ഞു.
Also Read: ദമ്പതിമാരുടെ മരണം; കുട്ടികളുടെ സംരക്ഷണം ഏറ്റെടുത്ത് സര്‍ക്കാര്‍
