കൊച്ചി: കഴിഞ്ഞ സീസണില്‍ കേരള ബ്ലാസ്റ്റേഴ്സിന്റെ മിന്നുംതാരമായിരുന്ന ബര്‍തല്യോമു ഒഗ്ബച്ചെ കേരള ടീം വിടുന്നു. അടുത്ത ഐ.എസ്.എല്‍ സീസണില്‍ മുംബൈ സിറ്റി എഫ്.സിക്ക് വേണ്ടിയാകും ഒഗ്ബച്ചെ കളത്തിലിറങ്ങുക.
ബ്ലാസ്റ്റേഴ്സിന്റെ നായകനായിരുന്ന താരം ഒരൊറ്റ സീസണില്‍ നിന്ന് 15 ഗോളുകള്‍ സ്വന്തമാക്കിയിരുന്നു. അരങ്ങേറ്റ സീസണില്‍ തന്നെ ഏറ്റവും കൂടുതല്‍ ഗോളുകള്‍ നേടുന്ന താരമെന്ന ഇയാന്‍ ഹ്യൂമിന്റെ റെക്കോര്‍ഡും ഇദ്ദേഹം മറികടന്നിരുന്നു.
2018-19 ലാണ് ഈ നൈജീരിയക്കാരന്‍ ഇന്ത്യന്‍ പ്രീമിയര്‍ ലീഗില്‍ അരങ്ങേറ്റം കുറിക്കുന്നത്. നോര്‍ത്ത് ഈസ്റ്റ് യുണൈറ്റഡില്‍ നിന്ന് കേരള ടീമിലെത്തി. കഴിഞ്ഞ ഐ.എസ്.എല്‍ സീസണില്‍ ബ്ലാസ്റ്റേഴ്സ് ആകെ 29 ഗോളുകളാണ് നേടിയത്. അതില്‍ 15ഉം ഒഗ്ബച്ചെയുടെ വകയാണ്.ബ്ലാസ്റ്റേഴ്സിന്റെ നായകനായിരുന്ന താരം ടീമിനെ വിട്ടുപോകുന്നതോടെ പ്രതിസന്ധിയിലാകുമെന്നാണ് ആരാധകരുടെ കണക്കുകൂട്ടലുകള്‍.
