മസ്‌കറ്റ്: രാജ്യാന്തര വിമാനസര്‍വീസുകള്‍ പുനരാരംഭിക്കാന്‍ ഒമാന്‍. ആഭ്യന്തരമന്ത്രി സയ്യിദ് ഹമൂദ് ബിന്‍ ഫൈസല്‍ അല്‍ ബുസൈദി ചെയര്‍മാനായ സുപ്രീം കമ്മിറ്റിയാണ് ഇതുസംബന്ധിച്ച തീരുമാനങ്ങളെടുത്തത്. ഒക്ടോബര്‍ 1 മുതലാണ് രാജ്യത്തെ വ്യോമഗതാഗതം പുനരാരംഭിക്കുക. കോവിഡ് പശ്ചാത്തലത്തില്‍ മാര്‍ച്ച് 29നാണ് സര്‍വീസ് നിര്‍ത്തിവെച്ചത്.
രാജ്യത്തെ കോവിഡ് വ്യാപനം ചെറുക്കുന്നതിന് വേണ്ടി സ്വീകരിച്ച നടപടികളും, പുരോഗതിയും സുപ്രീം കമ്മിറ്റിയില്‍ ചര്‍ച്ച ചെയ്തു. ഇതിനെത്തുടര്‍ന്നാണ് വ്യോമഗതാഗതം പുനരാരംഭിക്കാന്‍ തീരുമാനിച്ചത്. വിവിധ രാജ്യങ്ങളിലെ കോവിഡ് സാഹചര്യങ്ങളും ഉഭയകക്ഷി ധാരണയും മാനദണ്ഡമാക്കി തയാറാക്കുന്ന ഷെഡ്യൂള്‍ അനുസരിച്ചാകും സര്‍വീസുകള്‍ ക്രമീകരിക്കുക.
