മലപ്പുറം: നിലമ്പൂരിൽ വെള്ളം നിറച്ചുവെച്ച ബക്കറ്റിൽ വീണ് ഒരു വയസുകാരിക്ക് ദാരുണാന്ത്യം. പാത്തിപ്പാറ തരിയൻക്കോടൻ ഇർഷാദിന്റെ മകൾ ഇഷയാണ് മരിച്ചത്. കുട്ടിയെ കാണാതായതിനെ തുടർന്ന് വീട്ടുകാരും നാട്ടുകാരും നടത്തിയ തിരച്ചിലിനിടെയാണ് ബക്കറ്റിലെ വെള്ളത്തിൽ മുങ്ങി കിടക്കുന്ന നിലയിൽ കണ്ടെത്തിയത്.
ഉടൻ നിലമ്പൂർ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം നിലമ്പൂർ ആശുപത്രിയിൽ സൂക്ഷിച്ചിരിക്കുകയാണ്. കുട്ടിയുടെ പിതാവ് വിദേശത്താണ്. സമീപത്തെ വീട്ടിലെ ഫില്ലറിനോട് ചേർന്നുള്ള ബക്കറ്റിലാണ് കുഞ്ഞിനെ കണ്ടെത്തിയത്.
കുട്ടിയെ കാണാതെ അരമണിക്കൂറോളം തിരച്ചിൽ നടത്തിയെങ്കിലും കണ്ടെത്താനായിരുന്നില്ല. ആരെങ്കിലും എടുത്ത് കൊണ്ടുപോയതാണോ എന്നാണ് ആദ്യം സംശയിച്ചിരുന്നത്. പിന്നീടാണ് സമീപത്തെ വീട്ടിലെ ഫില്ലറിനോട് ചേർന്നുള്ള ബക്കറ്റ് ശ്രദ്ധയിൽപ്പെട്ടത്. ബക്കറ്റിലെ പാതി വെള്ളത്തിൽ തലകീഴായി മുങ്ങിക്കിടക്കുന്ന നിലയിലായിരുന്നു കുട്ടി ഉണ്ടായിരുന്നത്.
Most Read: ഗൂഢാലോചന കേസിലെ എഫ്ഐആർ റദ്ദാക്കണം; ഹരജി സമർപ്പിച്ച് ദിലീപ്