തിരുവനന്തപുരം: ഓണത്തോടനുബന്ധിച്ച് സംസ്ഥാനത്തെ കടകളുടെ പ്രവർത്തന സമയത്തിൽ ഇളവ് അനുവദിച്ചു. ഇന്ന് മുതൽ സെപ്തംബർ 2 വരെ കച്ചവട സ്ഥാപനങ്ങൾക്കും കടകൾക്കും രാത്രി 9 മണി വരെ തുറന്ന് പ്രവർത്തിക്കാമെന്ന് ചീഫ് സെക്രട്ടറി ബിശ്വാസ് മേത്ത അറിയിച്ചു. കണ്ടൈൻമെൻറ് സോണുകൾ ഒഴികെയുള്ള പ്രദേശങ്ങളിൽ മാത്രമാണ് ഇളവ് നൽകിയിരിക്കുന്നത്. കണ്ടൈൻമെൻറ് സോണിലെ കടകളും കച്ചവട സ്ഥാപനങ്ങളും നിലവിലെ മാർഗനിർദേശം അനുസരിച്ച് പ്രവർത്തിക്കണം.
കോവിഡ് പ്രതിസന്ധി കാരണം ഓണക്കാലത്തെ കച്ചവടം മോശമാക്കുന്നതിനാൽ വ്യാപാരികൾ നിരാശയിലായിരുന്നു. പ്രോട്ടോക്കോൾ അനുസരിച്ച് സാധനം വാങ്ങാൻ അകത്ത് കയറുന്നവർ തിരിച്ചിറങ്ങുമ്പോൾ ഒരുപാട് സമയമാകും. പുറത്ത് കാത്തിരുന്ന് മുഷിയുന്നവർ സാധനം വാങ്ങാതെ മടങ്ങി പോവുന്ന പ്രവണതയും കൂടുതലായിരുന്നു. ഈ സാഹചര്യത്തിൽ പ്രവർത്തിസമയം നീട്ടി നൽകണമെന്ന ആവശ്യം ശക്തമായിരുന്നു. ഇതിനനുസരിച്ചാണ് ഇളവുകൾ അനുവദിച്ചത്.
