തിരുവനന്തപുരം: പിജി ഡോക്ടർമാർ നടത്തി വന്നിരുന്ന സമരം ഭാഗികമായി പിൻവലിച്ചു. സർക്കാർ അഭ്യർഥനയും രോഗികളുടെ ബുദ്ധിമുട്ടും കണക്കിലെടുത്ത് ഇന്ന് മുതൽ അത്യാഹിത വിഭാഗത്തിൽ ഡ്യൂട്ടിയിൽ പ്രവേശിക്കാൻ തീരുമാനമെടുത്തതായി കെഎംപിജിഎ അറിയിച്ചു. അതേസമയം ഒപി വാർഡ് ബഹിഷ്കരണം തുടരും.
കഴിഞ്ഞ ദിവസം ആരോഗ്യ മന്ത്രിയുമായി നടത്തിയ ചർച്ചയെ തുടർന്നാണ് അത്യാഹിത വിഭാഗം ബഹിഷ്കരിച്ചുള്ള സമരം പിൻവലിക്കുന്നതെന്നും എന്നാൽ ആവശ്യങ്ങൾ പൂർണമായും പരിഹരിക്കുന്നത് വരെ ഭാഗികമായി സമരം തുടരുമെന്നും കെഎംപിജിഎ പറഞ്ഞു. മുതിർന്ന ആരോഗ്യ ഉദ്യോഗസ്ഥരുമായി ഇന്ന് വീണ്ടും ചർച്ചയുണ്ടെന്നും പ്രശ്നപരിഹാരം ഉണ്ടാകുമെന്ന് പ്രതീക്ഷിക്കുന്നതായും സമരക്കാർ അറിയിച്ചു.
അതേസമയം ഡോക്ടർമാരുടെ സമരത്തിന് മെഡിക്കൽ കോളേജ് ഹൗസ് സർജൻസ് നൽകി വന്നിരുന്ന പ്രത്യക്ഷ പിന്തുണ പിൻവലിച്ചു. ആവശ്യങ്ങളിൽ അനുഭാവപൂർവമായ ഇടപെടൽ സർക്കാരിന്റെ ഭാഗത്തു നിന്നും ഉണ്ടായെന്നും അതിനാൽ സമരത്തിന് നൽകി വന്നിരുന്ന പിന്തുണ പിൻവലിക്കുന്നു എന്നും ഹൗസ് സർജൻസ് അറിയിച്ചു.
Read also: കോടതി വളപ്പിലെ തെരുവ് നായ ശല്യം; റിപ്പോർട് തേടി മനുഷ്യാവകാശ കമ്മീഷൻ