തൃശൂര് : തൃശൂര് പോലീസ് അക്കാദമിയില് ട്രെയിനി ആയിരുന്ന യുവാവ് കോവിഡ് ബാധിച്ചു മരിച്ച സംഭവത്തില് അധികൃതരുടെ അനാസ്ഥയെന്ന് ബന്ധുക്കള്. അക്കാദമിയില് വച്ച് കോവിഡ് പരിശോധന നടത്തി രോഗം സ്ഥിരീകരിക്കുന്നതില് കാലതാമസമുണ്ടായെന്നും ബന്ധുക്കള് ആരോപിച്ചു. കഴിഞ്ഞ ചൊവ്വാഴ്ചയാണ് തൃശൂര് പോലീസ് അക്കാദമിയില് വച്ച് ആലപ്പുഴ സ്വദേശിയായ ഹരീഷ് കുമാര് കോവിഡ് ബാധിച്ചു മരിച്ചത്.
ഈ മാസം 13 ആം തീയതിയാണ് ഹരീഷിന് കോവിഡ് സ്ഥിരീകരിച്ചത്. അതിനെ തുടര്ന്ന് ആരോഗ്യ പ്രശ്നങ്ങള് രൂക്ഷമായിട്ടും ഹരീഷിനെ ആശുപത്രിയിലേക്ക് മാറ്റിയത് ഒരു ദിവസം വൈകിയാണെന്ന് ബന്ധുക്കള് പറഞ്ഞു. ഒപ്പം തന്നെ മെഡിക്കല് കോളേജിലും മതിയായ പരിചരണം ലഭിച്ചില്ല എന്ന ബന്ധുക്കള് ആരോപിച്ചു.
ഹൃദയാഘാതത്തെ തുടര്ന്നാണ് ഹരീഷ് മരിച്ചത് എന്നാണ് ബന്ധുക്കള്ക്ക് നല്കിയ വിവരം. എന്നാല് മരണ സര്ട്ടിഫിക്കറ്റില് ന്യുമോണിയ ആണ് മരണകാരണം എന്നാണ് രേഖപ്പെടുത്തിയിരിക്കുന്നത്. ഇത് കൂടുതല് സംശയത്തിന് ഇടയാക്കുന്നുണ്ട്. സംഭവത്തില് വിശദമായ അന്വേഷണം ആവശ്യപ്പെട്ട് മുഖ്യമന്ത്രിക്കും ഡിജിപി ക്കും കത്തയച്ചിട്ടുണ്ട്. ഹരീഷിന്റെ മരണവുമായി ബന്ധപ്പെട്ട് തങ്ങളുടെ ഭാഗത്തു നിന്നും വീഴ്ച പറ്റിയിട്ടില്ലെന്നാണ് പോലീസ് അക്കാദമി നല്കുന്ന വിശദീകരണം.
Read also : സംസ്ഥാനത്ത് ബാറുകള് ഉടന് തുറക്കില്ല; എക്സൈസ് കമ്മീഷണറുടെ ശുപാര്ശ തള്ളി