ന്യൂഡല്ഹി : ചികിത്സയില് കഴിയുന്ന മുന് രാഷ്ട്രപതി പ്രണബ് മുഖര്ജിയുടെ ആരോഗ്യനില അതീവഗുരുതരമെന്ന് ആശുപത്രി അധികൃതര്. ഡല്ഹിയിലെ ആര്മി റിസര്ച്ച് ആന്ഡ് റെഫറല് ആശുപത്രിയിലാണ് അദ്ദേഹം ചികിത്സയില് കഴിയുന്നത്. കഴിഞ്ഞ ദിവസം ആരോഗ്യനിലയില് നേരിയ പുരോഗതി ഉണ്ടെന്ന് പ്രണബിന്റെ മകന് അറിയിച്ചിരുന്നു. അതിനു പിന്നാലെയാണ് ഇപ്പോള് ആശുപത്രി അധികൃതര് നല്കുന്ന വിവരം.
പ്രണബിന്റെ ആരോഗ്യനില അതീവഗുരുതരമാണെന്നും ശ്വാസകോശത്തില് അണുബാധ ഉണ്ടായിട്ടുണ്ടെന്നും ആശുപത്രി അധികൃതര് പുറത്തിറക്കിയ കുറിപ്പില് വ്യക്തമാക്കുന്നുണ്ട്. ഇപ്പോള് ജീവന് നിലനിര്ത്തുന്നത് വെന്റിലേറ്ററിന്റെ സഹായത്തോടെയാണെന്നും, വിദഗ്ധ ഡോക്ടര്മാരുടെ സംഘം അദ്ദേഹത്തെ പരിചരിക്കുന്നുണ്ടെന്നും അധികൃതര് വ്യക്തമാക്കി.
തലച്ചോറില് രക്തം കട്ടപിടിച്ചതിനെ തുടര്ന്ന് ശസ്ത്രക്രിയക്ക് വിധേയനായ പ്രണബിന് ചികിത്സയ്ക്ക് മുന്പ് നടത്തിയ പരിശോധനയിലാണ് കോവിഡ് സ്ഥിരീകരിച്ചത്.