എറണാകുളം: യുവനടിയെ പീഡിപ്പിച്ച കേസിൽ നടനും നിർമാതാവുമായ വിജയ് ബാബുവിന്റെ ചോദ്യം ചെയ്യൽ ആരംഭിച്ചു. ഇന്ന് മുതൽ ജൂലൈ മൂന്നാം തീയതി വരെ വിജയ് ബാബുവിനെ പോലീസ് കസ്റ്റഡിയിൽ എടുത്താണ് ചോദ്യം ചെയ്യുന്നത്. രാവിലെ 9 മണി മുതൽ വൈകുന്നേരം 6 മണി വരെയാണ് ചോദ്യം ചെയ്യൽ.
ചോദ്യം ചെയ്യലിന് ഒപ്പം തന്നെ വിജയ് ബാബുവിനെ അന്വേഷണസംഘം തെളിവെടുപ്പിനും കൊണ്ടുപോകും. നിലവിൽ കേസിൽ വിജയ് ബാബുവിന് മുൻകൂർ ജാമ്യം ലഭിച്ചതിനാൽ ഹൈക്കോടതിയുടെ നിർദ്ദേശപ്രകാരം ആയിരിക്കും നടപടികൾ പുരോഗമിക്കുക. കഴിഞ്ഞ ദിവസമാണ് കർശന ഉപാധികളോടെ വിജയ് ബാബുവിന് ഹൈക്കോടതി മുൻകൂർ ജാമ്യം അനുവദിച്ചത്.
അതേസമയം വിജയ് ബാബുവിന് മുൻകൂർ ജാമ്യം അനുവദിച്ച ഹൈക്കോടതി വിധിക്കെതിരെ സുപ്രീം കോടതിയെ സമീപിക്കാനുള്ള നീക്കത്തിലാണ് സർക്കാർ. മുൻകൂർ ജാമ്യം അനുവദിച്ച നടപടിയിൽ നിയമ വിദഗ്ധരും, പൊതുസമൂഹവും കടുത്ത എതിർപ്പിലാണ്. അതിജീവിതയുടെ ഭാഗത്ത് നിന്നും കോടതി ചിന്തിക്കുന്നില്ലെന്ന തരത്തിലുള്ള ആരോപണങ്ങൾ വലിയ രീതിയിൽ ഉയരുന്നുണ്ട്. ഇതിന് പിന്നാലെയാണ് ഇപ്പോൾ സർക്കാർ സുപ്രീം കോടതിയെ സമീപിക്കാൻ ഒരുങ്ങുന്നത്.
Read also: പ്രതിപക്ഷ പ്രതിഷേധം; സഭാ നടപടികൾ നിർത്തിവെച്ചു-മാദ്ധ്യമങ്ങൾക്ക് വിലക്ക്