കണ്ണൂർ: സിപിഐഎം ജനറൽ സെക്രട്ടറിയായി മൂന്നാം തവണയും സീതാറാം യെച്ചൂരിയെ തിരഞ്ഞെടുത്തു. പുതുതായി തിരഞ്ഞെടുത്ത കേന്ദ്ര കമ്മിറ്റി അംഗങ്ങളുടെ യോഗത്തിലാണ് ഇത് സംബന്ധിച്ച തീരുമാനം കൈക്കൊണ്ടത്.
സിപിഐഎം കേന്ദ്ര കമ്മിറ്റിയെയും ഇന്ന് തിരഞ്ഞെടുത്തു. കേന്ദ്ര കമ്മിറ്റിയിൽ 17 പുതുമുഖങ്ങളാണ് ഉള്ളത്. ഇതിൽ നാല് പേർ കേരളത്തിൽ നിന്നാണ്. പി രാജീവ്, കെഎൻ ബാലഗോപാൽ, പി സതീദേവി, സിഎസ് സുജാത എന്നിവരാണ് കേരളത്തിൽ നിന്നും കേന്ദ്ര കമ്മിറ്റിയിലെത്തിയത്.
പിബി(പൊളിറ്റ് ബ്യൂറോ)യിലേക്കെ് എ വിജയരാഘവനെയും തിരഞ്ഞെടുത്തു. 75 വയസ് എന്ന പ്രായപരിധി കർശനമാകുന്നതിനാൽ എസ് രാമചന്ദ്രൻ പിള്ളയും ബിമൻ ബോസും ഹന്നൻ മൊള്ളയും പൊളിറ്റ് ബ്യൂറോയിൽ നിന്ന് ഒഴിവായി. അതേസമയം എസ് രാമചന്ദ്രൻ പിള്ള പ്രത്യേക ക്ഷണിതാവാകും.
ഇത്തവണ കേന്ദ്ര കമ്മിറ്റിയിലെ എണ്ണം കുറച്ചിട്ടുണ്ട്. 85 അംഗ കേന്ദ്ര കമ്മിറ്റിയെയാണ് ഇത്തവണ തിരഞ്ഞെടുത്തത്. ഇതിൽ 15 പേർ വനിതകളാണ്. വിഎസ് അച്യുതാനന്ദനും പാലൊളി മുഹമ്മദ് കുട്ടിയും പ്രത്യേക ക്ഷണിതാക്കളായി തന്നെ കേന്ദ്ര കമ്മിറ്റിയിൽ തുടരും.
Most Read: കെവി തോമസ് സിപിഎം സെമിനാറിൽ പങ്കെടുത്തത് തെറ്റ്; കെ മുരളീധരൻ
