ആലുവ: കൊച്ചി മെട്രോയിൽ ഗതാഗത നിയന്ത്രണം ഏർപ്പെടുത്തി. പാളത്തിലെ അലൈൻമെന്റിൽ തകരാർ കണ്ടെത്തിയ പത്തടിപ്പാലത്തെ തൂൺ ബലപ്പെടുത്തുന്നതിന്റെ ഭാഗമായാണ് നിയന്ത്രണം. തകരാർ കണ്ടെത്തിയ പത്തടിപ്പാലത്ത് കൂടിയുള്ള മെട്രോ സ‍ർവീസുകളാണ് ചുരുക്കാൻ തീരുമാനിച്ചത്.
ആലുവയിൽ നിന്ന് പേട്ടയിലേക്കും തിരിച്ചും നേരിട്ടുള്ള ട്രെയിൻ സർവീസ് ഇനി 20 മിനിറ്റ് ഇടവേളയിൽ മാത്രമാകും നടത്തുക. നേരത്തെ ഏഴ് മിനിറ്റ് ഇടവേളയിലായിരുന്നു സർവീസ്. പത്തടിപ്പാലത്ത് നിന്ന് പേട്ട, ആലുവ എന്നിവിടങ്ങളിലേക്കും തിരിച്ചും ഏഴ് മിനിറ്റ് ഇടവിട്ട് സർവീസ് നടത്തുമെന്നും കെഎംആർഎൽ അറിയിച്ചു.
അതേസമയം, കഴിഞ്ഞ ദിവസം ഇവിടെ എത്തിയ ഇ ശ്രീധരൻ ചെരിവ് സ്‌ഥിരീകരിച്ചിരുന്നു. ഇവിടെ വിശദ പരിശോധനകൾ നടത്തണമെന്നും ഇദ്ദേഹം സന്ദർശനത്തിന് ശേഷം അറിയിച്ചിരുന്നു. സംസ്‌ഥാനത്ത് തുടര്‍ച്ചയായുണ്ടായ കനത്ത മഴകാരണം മണ്ണിന്റെ ഘടനയില്‍ മാറ്റമോ അല്ലെങ്കില്‍ സോയില്‍ പൈപ്പിങ് പ്രതിഭാസമോ ചെരിവിന് കാരണമായോയെന്ന് പരിശോധിക്കണമെന്നും ഇദ്ദേഹം പറഞ്ഞു.
Read Also: ആരെയും കണ്ണീരു കുടിപ്പിച്ച് കെ-റെയിൽ പദ്ധതി നടപ്പാക്കില്ല; കോടിയേരി
