ഇടുക്കി: നരിയംപാറയിൽ പീഡനത്തിനിരയായി ആത്‍മഹത്യ ചെയ്‌ത പെൺകുട്ടിയുടെ ചിത്രം പ്രചരിപ്പിച്ച സംഭവത്തിൽ പോലീസ് കേസെടുത്തു. പെൺകുട്ടിയുടെ വീട്ടുകാർ നൽകിയ പരാതിയുടെ അടിസ്‌ഥാനത്തിലാണ്‌ പോലീസ് കേസെടുത്ത് അന്വേഷണം ആരംഭിച്ചത്.
കേസിലെ പ്രതി മനു മനോജ് പോലീസ് സ്‌റ്റേഷനിൽ ആത്‍മഹത്യ ചെയ്‌തതിന്‌ പിന്നാലെയാണ് പെൺകുട്ടിയുടെ ചിത്രം സമൂഹ മാദ്ധ്യമങ്ങളിൽ പ്രചരിച്ചത്. മനുവിന് ആദരാഞ്ജലി അർപ്പിച്ചുകൊണ്ട് സ്‌ഥാപിച്ച ഫ്‌ളക്‌സുകളിലും പെൺകുട്ടിയുടെ ചിത്രം ചേർത്തിരുന്നു. ഫ്‌ളക്‌സ് സ്‌ഥാപിച്ചവർക്കെതിരെയും കേസെടുക്കുമെന്ന് പോലീസ് പറഞ്ഞു.
Also Read: യാത്രക്കാര്‍ കൂടുന്നു; പഴയപടി ആകാന്‍ ഒരുങ്ങി കരിപ്പൂര്‍ വിമാനത്താവളം
കഴിഞ്ഞ ദിവസമാണ് നരിയംപാറ പീഡനക്കേസിലെ പ്രതി മനു മനോജിനെ ജയിലിൽ തൂങ്ങി മരിച്ച നിലയിൽ കണ്ടെത്തിയത്. റിമാൻഡിൽ കഴിയവേ ജയിലിന്റെ മൂന്നാം നിലയിലേക്ക് പോയ പ്രതി ഏറെ നേരം കഴിഞ്ഞിട്ടും തിരികെ വരാത്തത് ശ്രദ്ധയിൽപെട്ട ജീവനക്കാരാണ് മനുവിനെ തൂങ്ങി മരിച്ച നിലയിൽ കണ്ടെത്തിയത്. പോലീസ് മനുവിനെ കൊലപ്പെടുത്തിയതാണെന്ന് ആരോപിച്ച് ഇയാളുടെ അച്ഛൻ മനോജ് രംഗത്തെത്തിയിരുന്നു.
