ഒറ്റപ്പാലം: തെരുവ് നായയുടെ ആക്രമണത്തിൽ രണ്ട് കുട്ടികൾ ഉൾപ്പടെ 3 പേർക്ക് പരിക്ക്. നഗരസഭയിലെ വാർഡ് 21ൽപെട്ട മീറ്റ്‌നയിലാണ് സംഭവം. നായയുടെ കടിയേറ്റവരെ തൃശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
വീടിനകത്ത് കളിച്ചുകൊണ്ടിരുന്ന വടക്കേതിൽ രാജേഷിന്റെ മകൾ അനുശ്രീ (6), വടക്കേതിൽ ചാമിക്കുട്ടിയുടെ മകൻ ആദർശ് (4), എറക്കോട്ടിരി ദേവി നിവാസിൽ അമുദ (50) എന്നിവർക്കാണ് കടിയേറ്റത്. കുട്ടികളെ സംരക്ഷിക്കാൻ ശ്രമിക്കുന്നതിനിടെ തൊഴിലുറപ്പ് തൊഴിലാളി ചോലയിൽ പ്രേമകുമാരിക്കും (58) പരിക്കേറ്റു. നായയെ പ്രതിരോധിക്കാനുള്ള ശ്രമത്തിനിടെ താഴെ വീണ് ഇവരുടെ കൈയിലെ അസ്‌ഥി പൊട്ടി. താലൂക്ക് ആശുപത്രിയിൽ നിന്നും ഇവർക്ക് ശസ്‌ത്രക്രിയ നിർദേശിച്ചതായി വാർഡ് കൗൺസിലർ സജീവ് കുമാർ അറിയിച്ചു.
Read also: പേരാമ്പ്ര മണ്ഡലം; പ്രതിസന്ധി ഒഴിയാതെ യുഡിഎഫ് സ്‌ഥാനാർഥി നിർണയം
