മെക്സിക്കോ സിറ്റി: മെക്സിക്കോയിൽ ശക്തമായ ഭൂചലനം. പസഫിക് സമുദ്രത്തിന്റെ കരയിലെ റിസോർട്ട് നഗരമായ അകാപുൽകോക്ക് സമീപമാണ് ചൊവ്വാഴ്ച റിക്ടർ സ്കെയിലിൽ 7.1 തീവ്രത രേഖപ്പെടുത്തിയ ഭൂചലനം അനുഭവപ്പെട്ടത്. നൂറുകണക്കിന് കിലോമീറ്റർ അകലെയുള്ള തലസ്ഥാന നഗരത്തിൽ ഉൾപ്പെടെ കെട്ടിടങ്ങൾക്ക് കുലുക്കം അനുഭവപ്പെട്ടു.
ദുരന്തത്തിൽ ഒരാൾ മരണപ്പെട്ടതായാണ് റിപ്പോർട്ടുകൾ. ഗെറേറോ സംസ്ഥാനത്തിലെ അകപുൽകോക്ക് തെക്കുകിഴക്കായി 11 കിലോമീറ്റർ അകലെയാണ് ഭൂകമ്പത്തിന്റെ പ്രഭവകേന്ദ്രമെന്ന് നാഷണൽ സീസ്മോളജിക്കൽ സർവേ റിപ്പോർട് ചെയ്തു.
നഗര പ്രദേശമായ കൊയൂക്ക ഡി ബെനിറ്റെസിലാണ് ഒരാൾ മരിച്ചതെന്ന് ഗെറേറോ സ്റ്റേറ്റ് ഗവർണർ ഹെക്ടർ അസ്റ്റുഡില്ലോ മിലേനിയോ മാദ്ധ്യമങ്ങളോട് പറഞ്ഞു. എന്നാൽ ഭൂകമ്പത്തിന് ശേഷം രാജ്യത്ത് ഇതുവരെ വലിയ നാശ നഷ്ടങ്ങളൊന്നും റിപ്പോർട് ചെയ്തിട്ടില്ലെന്നാണ് പ്രസിഡണ്ട് ആന്ദ്രെസ് മാനുവൽ ലോപസ് ഒബ്രഡോർ വീഡിയോ സന്ദേശത്തിൽ അറിയിച്ചത്.
Read Also: റാബിയയുടെ കൊലപാതകം; നീതിതേടി പ്രതിഷേധം ശക്തം