തിരുവനന്തപുരം: 15ആം നിയമസഭയുടെ ആദ്യ സമ്മേളനത്തിൽ എംഎൽഎമാരുടെ സത്യപ്രതിജ്‌ഞ പുരോഗമിക്കുകയാണ്. മൂന്ന് നിയമസഭാ സമാജികര്‍ സത്യപ്രതിജ്‌ഞയിൽ വ്യത്യസ്‌തത പുലര്‍ത്തി. ദേവികുളം എംഎല്‍എ എ രാജ തമിഴിലാണ് സത്യപ്രതിജ്‌ഞ ചെയ്‌തത്‌. മഞ്ചേശ്വരം എംഎല്‍എ എകെഎം അഷ്‌റഫ് കന്നഡയിലും മുവാറ്റുപുഴ എംഎല്‍എ മാത്യു കുഴല്‍നാടന്‍ ഇംഗ്ളീഷിലുമാണ് സത്യവാചകം ചൊല്ലിയത്.
അക്ഷരമാല ക്രമത്തിലാണ് അംഗങ്ങള്‍ സത്യപ്രതിജ്‌ഞ ചെയ്‌ത്‌ അധികാരം ഏറ്റെടുക്കുന്നത്. 53 അംഗങ്ങള്‍ പുതുമുഖങ്ങളാണ്. കോവിഡ് ബാധയും ക്വാറന്റെയ്നും കാരണം ചില അംഗങ്ങള്‍ക്ക് ഇന്ന് സത്യപ്രതിജ്‌ഞ ചെയ്യാനാവില്ല. കെ ബാബു, എ വിന്‍സെന്റ്, എ അബ്‌ദുറഹ്‌മാൻ എന്നിവര്‍ എത്താനാവില്ലെന്ന് അറിയിച്ചിട്ടുണ്ട്. ഇവരുടെ സത്യപ്രതിജ്‌ഞ പിന്നീട് നടക്കും.
15ആം നിയമസഭയുടെ ആദ്യദിനമായ ഇന്ന് എംഎല്‍എമാരുടെ സത്യപ്രതിജ്‌ഞ മാത്രമാണ് നടക്കുക. നാളെയാണ് സ്‌പീക്കർ തിരഞ്ഞെടുപ്പ്. എംബി രാജേഷിനെയാണ് എൽഡിഎഫ് സ്‌പീക്കർ സ്‌ഥാനത്തേക്ക്‌ നിർത്തുന്നത്. യുഡിഎഫും മൽസരിക്കുന്നുണ്ട്. കുണ്ടറയിൽ നിന്നുള്ള എംഎൽഎ പിസി വിഷ്‌ണുനാഥാണ് യുഡിഎഫിന്റെ സ്‌പീക്കർ സ്‌ഥാനാർഥി.
Also Read: നിയമസഭയിൽ സ്വതന്ത്ര ബ്ളോക്കായി ഇരിക്കും; കെകെ രമ
