പൊന്നാനി: ഉൽഘാടനം വിവാദമായ മലപ്പുറം പുതിയിരുത്തിയിലെ കടയുടെ ഉടമയെ മരിച്ച നിലയിൽ കണ്ടെത്തി. പുതിയിരുത്തി മാഡ് മോട്ടോ ഗ്വിൽസ് കടയുടമയും അണ്ടത്തോട് സ്വദേശിയുമായ അനസിനെയാണ് ഇന്ന് രാവിലെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. മരണകാരണം വ്യക്തമല്ല.
കോവിഡ് നിയന്ത്രണങ്ങൾ ലംഘിച്ച് കടയുടെ ഉൽഘാടനം നിർവഹിച്ചതോടെ വലിയ വിവാദമായിരുന്നു. മാസങ്ങൾക്ക് മുമ്പാണ് കോവിഡ് നിയന്ത്രണങ്ങൾ നിലനിൽക്കുന്നതിനിടെ നിയന്ത്രണങ്ങൾ ലംഘിച്ച് ആൾക്കൂട്ടമെത്തി കടയുടെ ഉൽഘാടനം നടത്തിയത് വൻ പ്രശ്നമായിരുന്നു. വ്ളോഗർ മല്ലു ട്രാവലർ ആണ് ഉൽഘാടനം നടത്തിയത്.
ഉൽഘാടന ദിവസം ചാവക്കാട്-പൊന്നാനി ദേശീയപാതയിൽ മണിക്കൂറുകളോളം ഗതാഗതം സ്തംഭിക്കുകയും ചെയ്തിരുന്നു. സംഭവത്തിൽ വന്നേരി പോലീസ് കേസെടുക്കുകയും അനസിന്റെ വ്യാപാര പങ്കാളിയായ ഷമാസ് അടക്കം 15 പേരെ അറസ്റ്റ് ചെയ്തിരുന്നു. നിലവിൽ അനസിന്റെ മൃതദേഹം കുന്നംകുളം താലൂക്ക് ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റുമോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടു കൊടുക്കും.
Most Read: മഴ മുന്നറിയിപ്പിൽ മാറ്റം; സംസ്ഥാനത്ത് നാല് ജില്ലകളിൽ ഓറഞ്ച് അലർട്