തിരുവനന്തപുരം: നഗരസഭയിലെ നികുതി തട്ടിപ്പ് കേസിൽ ഒരാൾ അറസ്‌റ്റിൽ. ശ്രീകാര്യം സോണൽ ഓഫിസിലെ ഓഫിസ് അറ്റൻഡൻഡ് ബിജുവിനെയാണ് (42) ശ്രീകാര്യം പോലീസ് അറസ്‌റ്റ് ചെയ്‌തത്‌. ഈ കേസിലെ ആദ്യ അറസ്‌റ്റ് ആണ് ഇത്. നികുതി തട്ടിപ്പ് വിവാദമായതോടെ ഒളിവിലായിരുന്ന ഇയാളെ കല്ലറയിൽ നിന്നാണ് ശ്രീകാര്യം പോലീസ് പിടികൂടിയത്.
തിരുവനന്തപുരം നഗരസഭാ പരിധിയിലെ ഉള്ളൂർ, ആറ്റിപ്ര, ശ്രീകാര്യം, നേമം സോണൽ ഓഫിസിൽ നിന്നായി 33.96 ലക്ഷം രൂപയുടെ നികുതി പണം തിരിമറി നടന്നു എന്നാണ് കണ്ടെത്തൽ. സംസ്‌ഥാന കൺകറന്റ് ഓഡിറ്റ് വിഭാഗത്തിന്റെ പരിശോധനയിലാണ് വൻ തട്ടിപ്പ് തെളിഞ്ഞത്. നികുതി ഇനത്തിൽ ലഭിച്ച പണം ബാങ്കിൽ അടക്കാതെ തിരുവനന്തപുരം നഗരസഭയുടെ നാല് സോണൽ ഓഫിസിലെ ഉദ്യോഗസ്‌ഥരാണ് ലക്ഷങ്ങൾ തട്ടിയത്.
നികുതിവെട്ടിപ്പുമായി ബന്ധപ്പെട്ട് പോലീസ് ജാമ്യമില്ലാ വകുപ്പ് പ്രകാരം കേസുകൾ എടുത്തിട്ടുണ്ടെന്ന് മേയർ ആര്യ രാജേന്ദ്രൻ നേരത്തെ പറഞ്ഞിരുന്നു. നഗരസഭ സെക്രട്ടറിയുടെ നേതൃത്വത്തിലും അന്വേഷണം നടക്കുന്നുണ്ടെന്നും മേയർ അറിയിച്ചു. നികുതി വെട്ടിപ്പുമായി ബന്ധപ്പെട്ട് നഗരസഭയിലെ ഏഴ് ഉദ്യോഗസ്‌ഥരെ സസ്‌പെൻഡ് ചെയ്‌തിട്ടുണ്ട്‌.
Most Read: നവ്‌ജ്യോത് സിംഗ് സിദ്ദുവിനെ ഡെൽഹിയിലേക്ക് വിളിപ്പിച്ച് ഹൈക്കമാൻഡ്
