തളിപ്പറമ്പ്: മന്ന ജംക്ഷനിലെ ട്രാഫിക് സിഗ്നൽ ലൈറ്റുകളുടെ സമയക്രമത്തിൽ വ്യത്യാസം ഉണ്ടായത് രൂക്ഷമായ ഗതാഗത കുരുക്കിന് ഇടയാക്കുന്നു. 5 വർഷം മുൻപ് നഗരസഭ സ്ഥാപിച്ച ട്രാഫിക് സിഗ്നൽ ലൈറ്റുകൾ രാവിലെ 8 മുതൽ രാത്രി 8.30 വരെയായിരുന്നു പ്രവർത്തിച്ചിരുന്നത്. എന്നാൽ ഏതാനും നാളുകളായി ഇത് 7.15ന് ഓഫാകുന്ന നിലയിലാണ്.
ഇതോടെ രൂക്ഷമായ ഗതാഗത കുരുക്കാണ് ഇവിടെ അനുഭവപ്പെടുന്നത്. സ്വയം നിയന്ത്രിത സംവിധാനത്തിലൂടെ പ്രവർത്തിച്ചിരുന്ന സിഗ്നൽ ലൈറ്റ് സ്വയം സമയക്രമം മാറുകയാണ് ഉണ്ടായതെന്ന് ട്രാഫിക് പൊലീസ് പറയുന്നു. പകൽ ഗതാഗതം നിയന്ത്രിക്കാനുള്ള ഹോം ഗാർഡ് വൈകിട്ട് ഡ്യൂട്ടി കഴിഞ്ഞ് പോവുകയും പിന്നീട് സിഗ്നൽ സംവിധാനം ഓഫാവുകയും ചെയ്യുന്നതോടെയാണ് ഗതാഗതം തടസപ്പെടുന്നത്.
ഇവിടെ റോഡ് പാടേ തകർന്നതും കുരുക്ക് രൂക്ഷമാകാൻ കാരണമാകുന്നു. ലോക് ഡൗൺ കാലത്തിന് ശേഷം ഇപ്പോൾ റോഡിൽ വൻ തോതിൽ സ്വകാര്യ വാഹനങ്ങൾ വർധിച്ചതോടെ രാത്രി 7.15ന് ശേഷം ഇതുവഴി കടന്ന് പോകാൻ സാധിക്കാത്ത അവസ്ഥയാണ്. ഇക്കാര്യത്തിൽ അടിയന്തിര ഇടപെടൽ ആവശ്യമാണെന്ന് പോലീസ് നഗരസഭയെ അറിയിച്ചിട്ടുണ്ട്.
Read also: കണ്ണൂർ മാടായിപ്പാറയിൽ വീണ്ടും തീപിടിത്തം