മാനന്തവാടി: കാട്ടാനയില്‍ നിന്ന് രക്ഷപ്പെടാന്‍ ശ്രമിച്ച ട്രൈബല്‍ പ്രമോട്ടര്‍ക്ക് സ്‌കൂട്ടറില്‍ നിന്നു വീണ് പരുക്ക്. തോല്‍പെട്ടി മണ്ണുണ്ടി കോളനിയിലെ സിന്ധുവിനാണ് വണ്ടിയില്‍ നിന്നും ചാടാന്‍ ശ്രമിക്കവേ പരുക്കേറ്റത്. ഇന്നലെ രാവിലെ ചേമ്പുംകൊല്ലി ഭാഗത്താണു സംഭവം.
ഭിന്നശേഷിക്കാരിയായ ഇവര്‍ കാട്ടിക്കുളത്തു നിന്ന് ബേഗൂരിലേക്കു പോകുന്നതിനിടെ ചേമ്പുംകൊല്ലിയില്‍ എത്തിയപ്പോള്‍ കാട്ടാന വനത്തില്‍ നിന്ന് റോഡിലേക്ക് ഇറങ്ങി സ്‌കൂട്ടറിന് നേരെ തിരിയുകയായിരുന്നു. സ്‌കൂട്ടറില്‍ നിന്നു ചാടി രക്ഷപ്പെട്ടതിനാല്‍ സിന്ധുവിനെ ആന നേരിട്ട് ആക്രമിക്കുകയുണ്ടായില്ല. എന്നാല്‍ കാട്ടാന സ്‌കൂട്ടര്‍ മറിച്ചിടുകയും കേടുപാടു വരുത്തുകയും ചെയ്‌തു.
സ്‌കൂട്ടറിന് മുന്നില്‍ പോയ കാര്‍ യാത്രക്കാര്‍ കാട്ടാനയുടെ ചിത്രം പകര്‍ത്താന്‍ ശ്രമിക്കുകയുണ്ടായി. ഇതില്‍ വിറളിപൂണ്ടാണ് കാട്ടാന റോഡിലേക്ക് ഇറങ്ങിയതെന്നു സിന്ധു പറയുന്നു. റോഡില്‍ വീണ് പരുക്കേറ്റ സിന്ധുവിനെ തോല്‍പ്പെട്ടി അസി. വൈല്‍ഡ് ലൈഫ് വാര്‍ഡന്‍ പി സുനിലിന്റെ നേതൃത്വത്തില്‍ വനംവകുപ്പ് ഉദ്യോഗസ്‌ഥര്‍ മാനന്തവാടി ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ്.
Malabar News: കോഴിക്കോട് മെഡിക്കല്‍ കോളേജിലെ കോവിഡ് ടെലി ഐസിയു പ്രവര്‍ത്തന സജ്ജമായി
