ഡെൽഹി: ഓർമ്മശക്തി വർധിപ്പിക്കാൻ കുട്ടികളിൽ കുത്തിവെപ്പ് നടത്തിയ ട്യൂഷൻ അധ്യാപകൻ പിടിയിൽ. കിഴക്കൻ ഡൽഹിയിലെ മണ്ഡവാലിയിലാണ് സംഭവം. 6 മുതൽ 9 വരെ ക്ളാസുകളിലെ വിദ്യാർഥികൾക്ക് ട്യൂഷൻ എടുത്തിരുന്ന 20കാരനായ സന്ദീപ് എന്ന അധ്യാപകനെയാണ് പോലീസ് അറസ്റ്റ് ചെയ്തത്.
കഴിഞ്ഞ ദിവസം ട്യൂഷനു ശേഷം വിദ്യാർഥിയെ വിളിക്കാൻ എത്തിയ രക്ഷിതാവ് സന്ദീപ് മകൾക്ക് കുത്തിവെപ്പ് എടുക്കുന്ന കാണുകയും പോലീസിൽ പരാതി നൽകുകയും ആയിരുന്നു. തുടർന്ന് പോലീസ് നടത്തിയ അന്വേഷണത്തിൽ എല്ലാ വിദ്യാർഥികൾക്കും സന്ദീപ് കുത്തിവെപ്പ് എടുത്തിരുന്നതായി കണ്ടെത്തി.
എൻഎസ് സൊല്യൂഷൻസ് എന്ന ഇഞ്ചക്ഷനാണ് കുട്ടികൾക്ക് എടുത്തതെന്ന് ചോദ്യം ചെയ്യലിൽ സന്ദീപ് പോലീസിനോട് പറഞ്ഞു. സന്ദീപിന്റെ വീട്ടിൽ നടത്തിയ പരിശോധനയിൽ സിറിഞ്ചുകളും മരുന്നുകളും പോലീസ് പിടിച്ചെടുത്തു.
വിദ്യാർഥികളെ വൈദ്യപരിശോധനക്ക് വിധേയരാക്കിയതായി പോലീസ് അറിയിച്ചു. അതേസമയം കുത്തിവെപ്പിനെ തുടർന്ന് അസ്വസ്ഥത പ്രകടിപ്പിച്ച ചില കുട്ടികൾ ആശുപത്രിയിൽ ചികിൽസയിൽ കഴിയുകയാണ്. സൗജന്യമായിട്ട് ആയിരുന്നു സന്ദീപ് കുട്ടികൾക്ക് ട്യൂഷൻ എടുത്തിരുന്നത്.
Read Also: സ്വകാര്യ നിക്ഷേപം മാത്രമല്ല വികസനം; ബിപിസിഎൽ വിൽപ്പന ചൂണ്ടിക്കാട്ടി മുഖ്യമന്ത്രി