തിരുവനന്തപുരം: സംസ്ഥാനത്ത് രണ്ട് ലക്ഷം ഡോസ് വാക്സിൻ എത്തിയതോടെ പൂട്ടിയ വാക്സിനേഷൻ കേന്ദ്രങ്ങൾ വീണ്ടും തുറക്കും. കോവിഡ് കൂട്ടപരിശോധന ഇന്നും തുടരും. പ്രതിദിന കോവിഡ് രോഗികളുടെ എണ്ണം പതിനായിരം കടക്കുന്നത് ആശങ്ക ഉയർത്തുകയാണ്.
ഇന്നലെ രാത്രിയോടെയാണ് രണ്ട് ലക്ഷം ഡോസ് സംസ്ഥാനത്ത് എത്തിച്ചത്. ഇതിൽ 3,000 ഡോസ് വാക്സിൻ ക്ഷാമം രൂക്ഷമായ തിരുവനന്തപുരം ജില്ലക്ക് നൽകും. ആശുപത്രികളിലെ വാക്സിനേഷൻ കേന്ദ്രങ്ങൾ പുനരാരംഭിക്കും എങ്കിലും മാസ് ക്യാംപുകൾ പൂർണതോതിൽ സജ്ജമാകില്ല. കോവിഡ് കൂട്ടപരിശോധന ആദ്യ ദിവസം വിജയകരമായി പൂർത്തിയായിരുന്നു. ഒരു ലക്ഷത്തി ഇരുപത്തി അയ്യായിരം പരിശോധനകളാണ് ലക്ഷ്യമിട്ടിരുന്നത്, എന്നാൽ 1,33,836 പേരിൽ പരിശോധന നടത്താനായി.
ഏറ്റവും കൂടുതൽ പരിശോധന നടന്നത് കോഴിക്കോട് ജില്ലയിലാണ്. 19,300 പേരെയാണ് പരിശോധിച്ചത്. 3055 പേരെ പരിശോധിച്ച ഇടുക്കി ജില്ലയാണ് ഏറ്റവും പിന്നിൽ. എറണാകുളത്ത് 14,087 പേരെയും പരിശോധിച്ചു. രണ്ട് ദിവസത്തെ കൂട്ടപരിശോധനയിൽ രണ്ടര ലക്ഷം പേരെ പങ്കാളികളാക്കാനാണ് തീരുമാനം.
Also Read: ‘വോട്ടെടുപ്പ് കഴിഞ്ഞതോടെ വിഷുക്കിറ്റ് വിതരണം നിര്ത്തി’; സര്ക്കാരിനെതിരെ ചെന്നിത്തല