ആര്‍ അജയ് ജ്‌ഞാനമുത്തു ചിയാന്‍ വിക്രത്തെ നായകനാക്കി സംവിധാനം ചെയ്യുന്ന ആക്ഷന്‍ ത്രില്ലര്‍ ചിത്രം ‘കോബ്ര’യുടെ ടീസര്‍ പുറത്തുവിട്ടു. ചിത്രീകരണ സമയത്തുതന്നെ വാര്‍ത്തകളില്‍ ഇടംപിടിച്ചിരുന്ന ‘കോബ്ര’യില്‍ ഏഴ് വ്യത്യസ്‌ത ഗെറ്റപ്പുകളിലാണ് വിക്രം പ്രത്യക്ഷപ്പെടുന്നത്. ശ്രീനിധി ഷെട്ടിയാണ് ചിത്രത്തിലെ നായിക.
ഏറെ നാളുകള്‍ക്ക് ശേഷം ആരാധകരെ തൃപ്‌തിപ്പെടുത്താനാവുന്ന ഒരു വിക്രം ചിത്രമാണ് ‘കോബ്ര’യെന്ന പ്രതീക്ഷയാണ് ടീസര്‍ നല്‍കുന്നത്. ക്രിക്കറ്റ് താരം ഇര്‍ഫാന്‍ പഠാന്റെ സിനിമാലോകത്തേക്കുള്ള ആദ്യ ചുവടുവെപ്പു കൂടിയാണ് ഈ ചിത്രം. കൂടാതെ മലയാളത്തില്‍ നിന്ന് റോഷന്‍ മാത്യുവും മിയ ജോര്‍ജും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
ഇവര്‍ക്കുപുറമേ കെഎസ് രവികുമാര്‍, ആനന്ദ്‌രാജ്, റോബോ ശങ്കര്‍, മൃണാളിനീ രവി, മീനാക്ഷി ഗോവിന്ദ്‌ രാജന്‍ തുടങ്ങിയവരും ചിത്രത്തില്‍ അണിനിരക്കുന്നു.
7 സ്‌ക്രീന്‍ സ്‌റ്റുഡിയോസിന്റെ ബാനറില്‍ എസ് എസ് ലളിത് കുമാറാണ് ചിത്രത്തിന്റെ നിര്‍മാണം. ഹരീഷ് കണ്ണന്‍ ഛായാഗ്രഹണം നിര്‍വഹിക്കുന്ന ചിത്രത്തിന്റെ എഡിറ്റിംഗ് ഭുവന്‍ ശ്രീനിവാസനാണ് കൈകാര്യം ചെയ്യുന്നത്. സംഘട്ടന രംഗങ്ങള്‍ക്ക് ഏറെ പ്രധാന്യമുള്ള ചിത്രത്തിന്റെ ആക്ഷന്‍ കൊറിയോഗ്രഫി നിര്‍വഹിക്കുന്നത് ദിലീപ് സുബ്ബരായനാണ്.
Read Also: ഐഎസ്എല്‍; ബംഗളൂര് എഫ്‌സിയും ഈസ്‌റ്റ് ബംഗാളും ഇന്ന് നേര്‍ക്കുനേര്‍
