തിരുവനന്തപുരം: വിളപ്പില്‍ശാല പൊലീസ് സ്‌റ്റേഷനില്‍ ആത്‌മഹത്യക്ക് ശ്രമിച്ച ഗ്രേഡ് എസ്.ഐ മരിച്ചു. അമ്പലത്തിന്‍കാല രാഹുല്‍ നിവാസില്‍ രാധാകൃഷ്‌ണന്‍ (53) ആണ് ഇന്ന് പുലര്‍ച്ചെ മെഡിക്കല്‍ കോളേജില്‍ വെച്ച് മരിച്ചത്. വിശ്രമമുറിക്കുള്ളില്‍ തൂങ്ങി മരിക്കാന്‍ ശ്രമിക്കുന്നതിനിടയില്‍ സഹപ്രവര്‍ത്തകരാണ് രാധാകൃഷ്‌ണനെ ആശുപത്രിയില്‍ എത്തിച്ചത്. ഈ മാസം ഒന്നിനാണ് ഇദ്ദേഹം സ്‌റ്റേഷനില്‍ ആത്‌മഹത്യക്ക് ശ്രമിച്ചത്.
Read also: ഹത്രസ് കേസ്; പെണ്‍കുട്ടിയുമായി പ്രണയത്തില്‍ ആയിരുന്നെന്ന പ്രതിയുടെ വാദം തള്ളി കുടുംബം
ജോലിഭാരവും എസ്എച്ച്ഒയുടെ മാനസിക പീഡനവുമാണ് എസ്ആഐയുടെ ആത്‌മഹത്യക്ക് പിന്നിലെ കാരണമെന്ന് നേരത്തെ ആരോപണമുയര്‍ന്നിരുന്നു. 4 മാസം മുന്‍പാണ് രാധാകൃഷ്‌ണന്‍ വിളപ്പില്‍ശാല സ്‌റ്റേഷനില്‍ ചുമതല ഏറ്റെടുത്തത്. എന്നാല്‍ തനിക്കെതിരായ ആരോപണങ്ങള്‍ എസ്എച്ച്ഒ നിഷേധിച്ചു. രാധാകൃഷ്‌ണനെതിരെ മോശമായി പെരുമാറിയിട്ടില്ലെന്നും സംഭവത്തില്‍ ഏത് അന്വേഷണത്തിനും തയാറാണെന്നും എസ്എച്ച്ഒ നേരത്തെ പ്രതികരിച്ചിരുന്നു.
