ആലപ്പുഴ: മാന്നാറില്‍ യുവതിയെ തട്ടിക്കൊണ്ടു പോയ കേസില്‍ ഒരാള്‍ കൂടി അറസ്‌റ്റിലായി. ഗുണ്ടാ നേതാവ് കോട്ടയം സ്വദേശി ഷംസ് ആണ് പോലീസിന്റെ പിടിയിലായത്. ബിന്ദുവിനെ തട്ടിക്കൊണ്ടു പോകാന്‍ സ്വര്‍ണക്കടത്ത് സംഘം ഷംസിന്റെ സംഘത്തിനാണ് ക്വട്ടേഷന്‍ നല്‍കിയതെന്നാണ് പോലീസില്‍ നിന്നും ലഭിക്കുന്ന വിവരം.
കേസുമായി ബന്ധപ്പെട്ട് ഷംസിന്റെ കൂട്ടാളികളായ നാല് പേരെ പോലീസ് നേരത്തെ പിടികൂടിയിരുന്നു. ബിന്ദു സ്വര്‍ണക്കടത്ത് സംഘത്തിലെ കണ്ണിയാണെന്നും ധാരണ തെറ്റിച്ചതാണ് തട്ടിക്കൊണ്ടു പോകാന്‍ കാരണമെന്നുമാണ് അറിയുന്നത്.
ഫെബ്രുവരി 19ന് ദുബായിൽ നിന്ന് നാട്ടിലെത്തിയ ബിന്ദുവിനെ ഒരു സംഘം ആളുകൾ വീട് ആക്രമിച്ച് തട്ടിക്കൊണ്ടു പോവുകയായിരുന്നു. സ്വര്‍ണക്കടത്ത് സംഘത്തിന്റെ കണ്ണിയായി പ്രവര്‍ത്തിച്ചിരുന്ന ബിന്ദു പല തവണ സ്വര്‍ണം നാട്ടിലെത്തിച്ചതായി പോലീസിന് മൊഴി നല്‍കിയിട്ടുണ്ട്.
Read Also: ശിവശങ്കറിന്റെ ജാമ്യം റദ്ദാക്കിയില്ല; ഹരജി ആറാഴ്‌ചക്ക് ശേഷം പരിഗണിക്കും
