സേലം: ബെംഗളൂരു സ്വദേശിയായ യുവതിയുടെ മൃതദേഹം സ്യൂട്ട്കേസിനുള്ളിൽ ഒളിപ്പിച്ച നിലയിൽ കണ്ടെത്തി. കുമരസ്വാമിപ്പട്ടി നടേശന്റെ അപ്പാർട്മെന്റിലാണ് ബെംഗളൂരു സ്വദേശി പ്രതാപിന്റെ ഭാര്യ തേജ് മൊണ്ഡൽ (27)ന്റെ മൃതദേഹമാണ് കണ്ടെത്തിയത്. ഇവിടെ വാടകക്ക് താമസിക്കുകയായിരുന്നു യുവതി.
ഒരു വർഷം മുൻപാണ് യുവതി ഇവിടെ താമസം ആരംഭിച്ചത്. കുമരസ്വാമിപ്പട്ടിയിൽ ബ്യൂട്ടി സ്പാ നടത്തിവരികയായിരുന്നു യുവതി. കഴിഞ്ഞ നാല് ദിവസമായി യുവതിയെ കുറിച്ച് യാതൊരു വിവരവും ഇല്ലാത്തതിനെ തുടർന്ന് ചെന്നൈയിൽ താമസിക്കുന്ന ഭർത്താവ് പ്രദീപ് വീട്ടുടമ നടേശനെ വിവരമറിയിക്കുകയായിരുന്നു.
നടേശൻ വീട്ടിലെത്തിയപ്പോൾ മുറിയ്ക്കുള്ളിൽ നിന്ന് ദുർഗന്ധം വരികയും ഇയാൾ ഉടൻ തന്നെ പോലീസിൽ വിവരമറിയിക്കുകയും ചെയ്തു. പോലീസ് സ്ഥലത്തെത്തി നടത്തിയ പരിശോധനയിലാണ് യുവതിയുടെ മൃതദേഹം കണ്ടെത്തിയത്. കൈ കാലുകൾ ബന്ധിച്ച് സ്യൂട്ട്കേസിൽ അടച്ചുവെച്ച നിലയിലായിരുന്നു. മൃതദേഹം പോലീസ് ആശുപത്രിയിലേക്ക് മാറ്റി. സേലം പോലീസാണ് കേസ് അന്വേഷിക്കുന്നത്. യുവതിയുടെ ഫോൺ വിവരങ്ങൾ കേന്ദ്രീകരിച്ചാണ് അന്വേഷണം പുരോഗമിക്കുന്നതെന്ന് പോലീസ് അറിയിച്ചു.
Also Read: കനത്ത മഴ; സംസ്ഥാനത്തിന് സഹായം എത്തിക്കുമെന്ന് കേന്ദ്രം