ന്യൂഡെൽഹി: ലഖിംപൂര്‍ ഖേരിയിൽ നടന്ന കൂട്ടക്കൊലപാതകത്തിൽ ആശിഷ് മിശ്രയെ അറസ്‌റ്റ് ചെയ്യണമെന്ന ആവശ്യവുമായി ഡെൽഹിയിൽ യൂത്ത് കോൺഗ്രസ് പ്രതിഷേധം. കർഷകർ ഉൾപ്പടെ 9 പേരെ വാഹനം കയറ്റിക്കൊന്ന കേസിൽ കേന്ദ്രമന്ത്രി അജയ് മിശ്രയുടെ മകൻ ആശിഷ് മിശ്രയെ കേന്ദ്രസർക്കാർ സംരക്ഷിക്കുന്നുവെന്ന ആരോപണം ഉന്നയിച്ചാണ് പ്രതിഷേധം ശക്‌തമാക്കുന്നത്.
പ്രതിഷേധത്തെ തുടർന്ന് പ്രവർത്തകരും പോലീസും തമ്മിൽ ഏറ്റുമുട്ടൽ ഉണ്ടായി. പോലീസ് ബാരിക്കേഡ് മറികടക്കാന്‍ പ്രവര്‍ത്തകര്‍ ശ്രമിച്ചതാണ് സംഘര്‍ഷത്തിന് ഇടയാക്കിയത്. കുറ്റവാളികൾ ഇപ്പോഴും സ്വതന്ത്രരായി നടക്കുകയാണെന്നാണ് യൂത്ത് കോൺഗ്രസ് ആരോപണം ഉന്നയിക്കുന്നത്. പ്ളക്കാർഡുകളും, മുദ്രാവാക്യങ്ങളുമായി പ്രതിഷേധത്തിനെത്തിയ പ്രവർത്തകർ ആശിഷ് മിശ്രയുടെ കോലം കത്തിക്കുകയും ചെയ്‌തു.
കേന്ദ്രമന്ത്രി അജയ് മിശ്രയുടെ സന്ദർശനത്തിന് എതിരെ പ്രതിഷേധം നടത്തുകയായിരുന്ന കർഷകർക്ക് നേരെ ആശിഷ് മിശ്രയുടെ വാഹനവ്യൂഹം ഇടിച്ചു കയറ്റിയാണ് കൂട്ടക്കൊല നടത്തിയത്. ഇതേ തുടർന്ന് 4 കർഷകർ ഉൾപ്പടെ 9 പേർക്കാണ് മരണം സംഭവിച്ചത്. സംഭവത്തെ തുടർന്ന് ജുഡീഷ്യൽ അന്വേഷണത്തിന് യുപി സർക്കാർ ഉത്തരവിട്ടിട്ടുണ്ട്.
Read also: സ്വർണക്കടത്ത് കേസ്; സന്ദീപ് നായർ ജയിൽ മോചിതനായി
