തിരുവനന്തപുരം : സംസ്‌ഥാനത്ത് വാക്‌സിൻ ക്ഷാമം നിലനിൽക്കുന്ന സാഹചര്യത്തിൽ തിരുവനന്തപുരം ജില്ലയിലെ 131 വാക്‌സിൻ കേന്ദ്രങ്ങൾ പൂട്ടി. കൂടാതെ ജിമ്മി ജോർജ് സ്‌റ്റേഡിയത്തിലെ മെഗാ വാക്‌സിനേഷൻ ക്യാമ്പും വാക്‌സിൻ ക്ഷാമത്തെ തുടർന്ന് പൂട്ടിക്കഴിഞ്ഞു. ഇതേ തുടർന്ന് കുത്തിവെയ്‌പ് എടുക്കാൻ എത്തിയ ആളുകൾ വാക്‌സിൻ സ്വീകരിക്കാതെ മടങ്ങി.
സംസ്‌ഥാനത്ത് കോവിഡ് വ്യാപനം രൂക്ഷമായ സാഹചര്യത്തിലാണ് വാക്‌സിനേഷൻ നടപടികൾ വർധിപ്പിക്കാൻ തീരുമാനിച്ചത്. ഒരു മാസത്തിനുള്ളിൽ 45 വയസിന് മുകളിലുള്ള മുഴുവൻ പേർക്കും വാക്‌സിൻ നൽകാനായിരുന്നു തീരുമാനം. ഇതിനായി നിരവധി വാക്‌സിനേഷൻ ക്യാമ്പുകൾ സംസ്‌ഥാനത്ത് സംഘടിപ്പിക്കാൻ അധികൃതർ തീരുമാനിച്ചിരുന്നു. എന്നാൽ വാക്‌സിൻ ക്ഷാമം രൂക്ഷമായ സാഹചര്യത്തിൽ തിരുവനന്തപുരം ഉൾപ്പടെയുള്ള ജില്ലകളിലെ മെഗാ വാക്‌സിനേഷൻ ക്യാമ്പുകൾ മുടങ്ങിയിട്ടുണ്ട്.
എന്നാൽ വാക്‌സിൻ ക്ഷാമം പരിഹരിക്കുന്നതിനായി കൂടുതൽ ഡോസ് കോവിഡ് വാക്‌സിൻ ഇന്ന് സംസ്‌ഥാനത്ത് എത്തുമെന്നാണ് ആരോഗ്യവകുപ്പ് പ്രതീക്ഷിക്കുന്നത്. 5 ലക്ഷത്തോളം ഡോസ് കോവിഡ് വാക്‌സിൻ സംസ്‌ഥാനത്ത് എത്തുമെന്നാണ് കേന്ദ്രത്തിന്റെ ഭാഗത്ത് നിന്നുള്ള അറിയിപ്പ്. ഇവ ഇന്ന് വൈകുന്നേരത്തോടെ സംസ്‌ഥാനത്ത് എത്തുമെന്നാണ് പ്രതീക്ഷ.
Read also : കെഎസ്ആർടിസി ബസും സ്വകാര്യ ബസും കൂട്ടിയിടിച്ച് അപകടം; നിരവധി പേർക്ക് പരിക്ക്
