തൃശൂർ : ജില്ലയിൽ നിന്നും ലക്ഷങ്ങൾ വിലമതിക്കുന്ന ലഹരിമരുന്നുമായി യുവാവ് പോലീസ് പിടിയിൽ. കൂർക്കഞ്ചേരി കാഞ്ഞിരങ്ങാടി സ്വദേശി ഷാ മൻസിലിൽ ഷാഫി(30)യെയാണ് പോലീസ് അറസ്റ്റ് ചെയ്തത്. ലക്ഷങ്ങൾ വിലവരുന്ന എംഡിഎംഎ, എൽഎസ്ഡി തുടങ്ങിയ ലഹരിമരുന്നുകളാണ് പ്രതിയുടെ പക്കൽ നിന്നും പോലീസ് കണ്ടെടുത്തത്.
നഗരത്തിൽ പ്രവർത്തിച്ചു വരുന്ന ചില പുതുതലമുറയിലുള്ള തുണിക്കടകൾ കേന്ദീകരിച്ച് ലഹരിമരുന്നുകളുടെ വിൽപ്പന നടക്കുന്നതായി പോലീസിന് വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് ഷാഫിയെ പിടികൂടിയത്. കമ്മീഷണർ ആർ ആദിത്യക്കാണ് ഇത് സംബന്ധിച്ച വിവരം ലഭിച്ചത്. പിടികൂടിയ ലഹരിമരുന്നുകൾ പലതും അതിമാരകമായ രാസവസ്തുക്കൾ ഉപയോഗിച്ച് നിർമ്മിക്കുന്നവയാണ്. ഇവ പാർട്ടി ഡ്രഗ് എന്ന പേരിലാണ് തൃശൂരിലെത്തുന്നത് എന്നും പോലീസ് വ്യക്തമാക്കി.
ജില്ലയിൽ എത്തുന്ന ഈ ലഹരിവസ്തുക്കൾ മെത്ത്, കല്ല്, പൊടി, കൽക്കണ്ടം തുടങ്ങിയ പേരുകളിലാണ് യുവാക്കളിലേക്ക് എത്തിക്കുന്നത്. എസിപി വികെ രാജുവിന്റെ നേതൃത്വത്തിൽ വെസ്റ്റ് എസ്എച്ച്ഒ സലീഷ് എൻ ശങ്കർ, നിഴൽ പോലീസ് എസ്ഐമാരായ ടിആർ ഗ്ളാഡ്സറ്റൺ, എൻജി സുവൃതകുമാർ, പിഎം റാഫി, രാജൻ, എഎസ്ഐമാരായ ഗോപാലകൃഷ്ണൻ, ടിവി ജീവൻ, പികെ പഴനിസ്വാമി, കെബി വിപിൻദാസ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
Read also : അടച്ചിട്ട ബേക്കറി കത്തിനശിച്ചു; 5 ലക്ഷം രൂപയുടെ നഷ്ടം