വയനാട്: വൈത്തിരിയിൽ ആൾക്കൂട്ടത്തിൽ വെച്ച് കീഴുദ്യോഗസ്‌ഥനെ മർദ്ദിച്ച പോലീസ് ഇൻസ്‌പെക്‌ടർക്ക് സ്‌ഥലം മാറ്റം. വൈത്തിരി എസ്‌എച്ച്‌ഒ ബോബി വർഗീസിനെയാണ് തൃശൂർ ചെറുതുരുത്തി സ്‌റ്റേഷനിലേക്ക് മാറ്റിയത്. വൈത്തിരി സ്‌റ്റേഷനിലെ സിവിൽ പോലീസ് ഓഫീസർ റഫീഖിനെയാണ് പൊതുജനമധ്യത്തിൽ അവഹേളിച്ചതും മർദ്ദിച്ചതും.
ജനുവരി 19ന് ബോബി കീഴുദ്യോഗസ്‌ഥനെ തല്ലിയത് വിവാദമായിരുന്നു. ഒരാൾ പെൺകുട്ടിയോട് മോശമായി പെരുമാറിയെന്ന വിവരം കിട്ടി സ്‌റ്റേഷനിലെ ഉദ്യോഗസ്‌ഥർ സ്‌ഥലത്ത്‌ എത്തിയിരുന്നു. ആൾക്കൂട്ടവുമായി ഏറെനേരം തർക്കം ഉണ്ടായിട്ടും യൂണിഫോമിൽ അല്ലാതിരുന്ന സിവിൽ പോലീസ് ഓഫീസർ ജീപ്പിൽ നിന്ന് ഇറങ്ങാതിരുന്നത് ഇൻസ്‌പെക്‌ടറെ ക്ഷുഭിതനാക്കി.
പോലീസുകാരനോട് വാഹനത്തിൽ നിന്ന് ഇറങ്ങിപ്പോവാൻ പറയുന്നതിനിടെ ഇൻസ്‌പെക്‌ടർ റഫീഖിന്റെ കയ്യിൽ തല്ലുന്നതിന്റെ വീഡിയോ വ്യാപകമായി പ്രചരിച്ചിരുന്നു. അതിനിടെ, ഇൻസ്‌പെക്‌ടറുടെ ഭാഗത്ത് വീഴ്‌ച ഉണ്ടായതായി രഹസ്യാന്വേഷണ വിഭാഗം ജില്ലാ പോലീസ് മേധാവിക്ക് റിപ്പോർട് നൽകി.
Most Read| രഞ്‌ജിത്ത് വധക്കേസ്; ജഡ്‌ജിയെ ഭീഷണിപ്പെടുത്തിയ കേസിൽ മൂന്ന് പേർ അറസ്‌റ്റിൽ
