ഇറ്റാനഗര്‍: അരുണാചല്‍ പ്രദേശ് പൂര്‍ണമായും കോവിഡ് മുക്‌തമായി. ചികിൽസയിൽ ഉണ്ടായിരുന്ന മൂന്ന് പേര്‍ കൂടി ഞായറാഴ്‌ച രോഗമുക്‌തി നേടിയതോടെയാണ് ഈ നേട്ടം കൈവരിച്ചതെന്ന് ആരോഗ്യ വകുപ്പ് അറിയിച്ചു.
16,836 പേര്‍ക്കാണ് അരുണാചല്‍ പ്രദേശില്‍ ഇതു വരെ കോവിഡ് സ്‌ഥിരീകരിച്ചത്. ഇതില്‍ 16,780 പേര്‍ രോഗമുക്‌തി നേടി. കഴിഞ്ഞ 24 മണിക്കൂറിനിടെ പുതിയ കേസുകളൊന്നും റിപ്പോര്‍ട് ചെയ്‌തിട്ടില്ലെന്ന് സംസ്‌ഥാന നിരീക്ഷണ ഉദ്യോഗസ്‌ഥന്‍ പറഞ്ഞു.
ഇതുവരെ 56 പേരാണ് കോവിഡ് മൂലം അരുണാചല്‍ പ്രദേശില്‍ മരിച്ചത്. സംസ്‌ഥാനത്തെ രോഗമുക്‌തി നിരക്ക് 99.66 ശതമാനവും പോസിറ്റീവിറ്റി നിരക്ക് പൂജ്യം ശതമാനവുമാണെന്ന് ഔദ്യോഗിക വക്‌താവ് വ്യക്‌തമാക്കി.
ശനിയാഴ്‌ച പരിശോധന നടത്തിയ 312 സാംപിളുകളുള്‍പ്പടെ 4,05,647 സാംപിളുകളാണ് ഇതു വരെ പരിശോധിച്ചത്. നിലവിൽ 32,325 ആരോഗ്യ പ്രവര്‍ത്തകരും മുന്നണി പോരാളികളും സംസ്‌ഥാനത്ത്‌ ഇതുവരെ പ്രതിരോധ വാക്‌സിന്‍ സ്വീകരിച്ചു.
Kerala News: പിഎസ്‌സി സമരം; സർക്കാർ നൽകിയ വാഗ്‌ദാനങ്ങൾ തട്ടിപ്പെന്ന് ചെന്നിത്തല
