മൊടക്കല്ലൂർ: കോഴിക്കോട് കോവിഡ് ബാധിച്ച് ചികിൽസയിൽ കഴിയുന്ന യുവതിയെ പീഡിപ്പിക്കാൻ ശ്രമം. ഉള്ളിയേരി മലബാർ മെഡിക്കൽ കോളേജിലാണ് സംഭവം. ആശുപത്രി ജീവനക്കാരൻ പീഡിപ്പിക്കാൻ ശ്രമിച്ചുവെന്നാണ് യുവതിയുടെ പരാതി. പോലീസ് ഇവരുടെ മൊഴി ഇന്ന് രേഖപ്പെടുത്തും.
ആശുപത്രിയിലെ സെക്യൂരിറ്റി ജീവനക്കാരനെതിരെയാണ് യുവതി പരാതി നൽകിയിരിക്കുന്നത്. ഇന്നലെ രാത്രി പതിനൊന്നരയോടെയാണ് സംഭവം. ഡോക്‌ടറെ കാണിക്കാണെന്ന് പറഞ്ഞ് വിളിച്ചു വരുത്തി ആളൊഴിഞ്ഞ ഭാഗത്തേക്ക് കൊണ്ടുപോയി പീഡിപ്പിക്കാൻ ശ്രമിച്ചെന്നാണ് പരാതി.
Also Read: മാപ്പ് സാക്ഷിയെ ഭീഷണിപ്പെടുത്തിയ സംഭവം; അന്വേഷണം ഗണേഷ് കുമാറിലേക്ക്; സെക്രട്ടറിയെ ചോദ്യം ചെയ്യും
ഇയാൾക്കെതിരെ മുമ്പും യുവതി ആശുപത്രി അധികൃതർക്ക് പരാതി നൽകിയിട്ടുണ്ട്. രജിസ്‌റ്ററിൽ നിന്ന് പേരുവിവരങ്ങൾ ശേഖരിച്ച് ശല്യപ്പെടുത്താൻ ശ്രമിച്ചെന്നായിരുന്നു പരാതി നൽകിയിരുന്നത്. എന്നാൽ ആശുപത്രി അധികൃതർ വേണ്ട നടപടി സ്വീകരിച്ചില്ല.
കഴിഞ്ഞ വ്യാഴാഴ്‌ചയാണ്‌ യുവതിക്ക് കോവിഡ് സ്‌ഥിരീകരിക്കുന്നത്. തുടർന്ന് മലബാർ മെഡിക്കൽ കോളേജിൽ ചികിൽസ തേടുകയായിരുന്നു. യുവതിയുടെ മാതാപിതാക്കളും കോവിഡ് ബാധിച്ച് ഇതേ ആശുപത്രിയിലാണ് ചികിൽസയിൽ കഴിയുന്നത്.
