കോഴിക്കോട്: കുതിരവട്ടം മാനസികാരോഗ്യ കേന്ദ്രത്തിൽ നിന്ന് ഭക്ഷ്യ സാധനങ്ങൾ കടത്താൻ ശ്രമം. സംഭവവുമായി ബന്ധപ്പെട്ട് രണ്ട് ജീവനക്കാരെ വിജിലൻസ് പിടികൂടി. ആശുപത്രിയിലെ പാചകക്കാരായ ശിവദാസൻ, കമാൽ എന്നിവരെയാണ് കോഴിക്കോട് വിജിലൻസ് സംഘം പിടികൂടിയത്.
അന്തേവാസികൾക്കായി എത്തിക്കുന്ന അരിയും പച്ചക്കറികളും ചിലർ സ്വന്തം ആവശ്യത്തിനായി കൊണ്ടുപോകുന്നുവെന്ന് വിവരം ലഭിച്ചതിന്റെ അടിസ്‌ഥാനത്തിൽ ആയിരുന്നു കോഴിക്കോട് വിജിലൻസ് സംഘം കേന്ദ്രത്തിൽ മിന്നൽ പരിശോധന നടത്തിയത്. പരിശോധനയിൽ ജീവനക്കാരുടെ ഭാഗത്തു നിന്ന് വീഴ്‌ച ഉണ്ടായതായി കണ്ടെത്തുകയായിരുന്നു.
പിടിയിലായവർക്കെതിരെ വിജിലൻസ് വകുപ്പുതല നടപടിക്ക് ശുപാർശ ചെയ്‌തു. ഭക്ഷ്യസാധനങ്ങൾ കടത്തിയ രണ്ട് ജീവനക്കാരെ കഴിഞ്ഞ വർഷവും വിജിലൻസ് പിടികൂടിയിരുന്നു. വിജിലൻസ് നൽകിയ വിവരങ്ങൾ ഡിഎംഒയ്‌ക്ക് കൈമാറിയിട്ടുണ്ടെന്നും, ഡിഎംഒ തുടർനടപടികൾ സ്വീകരിക്കുമെന്നും കുതിരവട്ടം മാനസികാരോഗ്യ ആശുപത്രി സൂപ്രണ്ട് അറിയിച്ചു.
Most Read: റിയാദിലെ എണ്ണ ശുദ്ധീകരണ ശാലയിൽ ഹൂതി വിമതരുടെ ആക്രമണം
