കൊൽക്കത്ത : രാജ്യത്ത് പ്രതിദിനം ഉയരുന്ന ഇന്ധനവിലയിൽ പ്രതിഷേധിച്ച് സൈക്കിൾ ചവിട്ടി നിയമസഭയിലെത്തി പശ്‌ചിമബംഗാൾ മന്ത്രി. തൃണമൂൽ കോൺഗ്രസ് മന്ത്രിയായ ബേചാറാം മന്നയാണ് സിംഗൂരിലെ വീട്ടിൽ നിന്ന് കൊൽക്കത്തയിലെ നിയമസഭയിലേക്ക് സൈക്കിളിൽ എത്തിയത്. ഏകദേശം 40 കിലോമീറ്റർ സൈക്കിൾ ചവിട്ടിയാണ് അദ്ദേഹം നിയമസഭയിൽ എത്തിച്ചേർന്നത്.
പ്രതിദിനം ഉയരുന്ന ഇന്ധനവില വർധനക്കെതിരെയുള്ള പ്രതിഷേധമാണ് ഇതെന്നും, രാജ്യത്തെ സാധാരണക്കാരായ ജനങ്ങളുടെ ബാധ്യത വർധിപ്പിക്കുകയാണ് മോദി സർക്കാർ ചെയ്യുന്നതെന്നും മന്ന വ്യക്‌തമാക്കി. ഇന്ധനവില കുറക്കാൻ മോദി സർക്കാർ യാതൊരുവിധ നടപടികളും സ്വീകരിക്കുന്നില്ലെന്നും, ഇത് പ്രതിഷേധാർഹമാണെന്നും മന്ന കൂട്ടിച്ചേർത്തു.
കൂടാതെ ഇന്ധനവില വർധനക്കെതിരെ സംസ്‌ഥാന വ്യാപകമായി തൃണമൂൽ കോൺഗ്രസ് പ്രതിഷേധത്തിന് ആഹ്വാനം ചെയ്‌തിട്ടുണ്ട്‌. ജൂലൈ 10, 11 തീയതികളിലാണ് സംസ്‌ഥാനത്ത് പ്രതിഷേധം സംഘടിപ്പിക്കുക.
Read also : കേരള-കർണാടക സർവീസുകൾ ആരംഭിക്കാൻ കെഎസ്ആർടിസി തയ്യാർ; മന്ത്രി ആന്റണി രാജു
