തിരുവനന്തപുരം : കോവിഡ് നിയന്ത്രണങ്ങളിൽ ഇളവുകൾ നൽകിയ സാഹചര്യത്തിൽ കേരള-കർണാടക അന്തർ സംസ്ഥാന സർവീസുകൾ ആരംഭിക്കാൻ കെഎസ്ആർടിസി തയ്യാറാണെന്ന് വ്യക്തമാക്കി ഗതാഗത മന്ത്രി ആന്റണി രാജു. ഇക്കാര്യം കർണാടക സർക്കാരിനെ അറിയിച്ചതായും മന്ത്രി കൂട്ടിച്ചേർത്തു.
ഈ മാസം 12ആം തീയതി മുതൽ സർവീസുകൾ ആരംഭിക്കാൻ തയ്യാറാണെന്നാണ് കർണാടക സർക്കാരിനെ അറിയിച്ചിരിക്കുന്നത്. ഇക്കാര്യത്തിൽ കർണാടക സർക്കാരിന്റെ മറുപടി കാത്തിരിക്കുകയാണെന്നും, മറുപടി ലഭിച്ചാൽ മാത്രമേ ഈ സർവീസുകളിലേക്കുള്ള ടിക്കറ്റ് ബുക്കിംഗ് ആരംഭിക്കാൻ സാധിക്കൂ എന്നും മന്ത്രി അറിയിച്ചു.
സർവീസുകൾ പുനഃരാരംഭിക്കാൻ അനുമതി ലഭിച്ചാൽ പൂർണമായും കോവിഡ് മാനദണ്ഡങ്ങൾ പാലിച്ചുകൊണ്ടായിരിക്കും സർവീസുകൾ നടത്തുകയെന്ന് മന്ത്രി വ്യക്തമാക്കി. യാത്രക്കാരുടെ ആവശ്യാനുസരണം കോഴിക്കോട്-കാസർഗോഡ് വഴി പരിമിതമായ സർവീസുകൾ മാത്രമായിരിക്കും നടത്തുക. കൂടാതെ ഇതേ റൂട്ട് വഴി തന്നെയായിരിക്കും കർണാടക റോഡ് കോർപ്പറേഷനും സർവീസുകൾ നടത്തുകയെന്ന് മന്ത്രി കൂട്ടിച്ചേർത്തു.
Read also : മഹാരാഷ്ട്ര മുന് മന്ത്രി കൃപാശങ്കര് സിങ് ബിജെപിയിൽ ചേർന്നു