ന്യൂ ഡെല്‍ഹി: മധുര പലഹാരങ്ങള്‍ക്ക് ബെസ്റ്റ് ബീഫോര്‍ തീയതി നിര്‍ബന്ധമാക്കാന്‍ ദേശീയ ഭക്ഷ്യ സുരക്ഷ അതോറിറ്റിയുടെ (എഫ്.എസ്.എസ്.എ.ഐ) നിര്‍ദ്ദേശം. ഒക്‌ടോബര്‍ 1 മുതല്‍ രാജ്യവ്യാപകമായി പുതിയ നിര്‍ദ്ദേശം നടപ്പിലാക്കാനാണ് തീരുമാനം. പാക്കറ്റുകളിലല്ലാതെ, പാത്രങ്ങളിലും, ട്രെകളിലും, ഷെല്‍ഫുകളിലും സൂക്ഷിച്ചിരിക്കുന്ന പലഹാരങ്ങള്‍ക്കാണ് ബെസ്റ്റ് ബീഫോര്‍ തീയതി നിര്‍ബന്ധമാക്കുന്നത്. ബെസ്റ്റ് ബീഫോര്‍ തീയതി പ്രദര്‍ശിപ്പിക്കാത്ത പലഹാരങ്ങളുടെ വില്‍പന അടുത്ത മാസം മുതല്‍ അനുവദിക്കില്ലെന്നും അതോറിറ്റി വ്യക്തമാക്കി. പലഹാരങ്ങളില്‍ നിര്‍മ്മാണ തീയതിയും പ്രദര്‍ശിപ്പിക്കാം, എന്നാല്‍ ഈ തീയതി നിര്‍ബന്ധമല്ല.
ഭക്ഷ്യ സുരക്ഷ ഉറപ്പാകുകയെന്ന ലക്ഷ്യത്തോടെയാണ് ഭക്ഷ്യ സുരക്ഷ അതോറിറ്റിയുടെ പുതിയ നിര്‍ദ്ദേശം. ഗുണനിലവാരമില്ലാത്തതും മായം ചേര്‍ത്തതുമായ പലഹാരങ്ങള്‍ വില്‍ക്കുന്നതുമായി ബന്ധപ്പെട്ട് നിരവധി പരാതികള്‍ ഉയര്‍ന്നുവരുന്ന സാഹചര്യത്തിലാണ് നിര്‍ദ്ദേശം പുറപ്പെടുവിച്ചിരിക്കുന്നത്. വിവിധ പലഹാരങ്ങള്‍ ഷെല്‍ഫുകളില്‍ സൂക്ഷിക്കാവുന്ന കാലാവധിയെ കുറിച്ചും എഫ്.എസ്.എസ്.എ.ഐയുടെ വെബ്‌സൈറ്റില്‍ പരാമര്‍ശിക്കുന്നുണ്ട്.
