ന്യൂഡെൽഹി: രണ്ട് ദിവസത്തെ ഇന്ത്യ സന്ദർശനത്തിനായി എത്തിയ ബ്രിട്ടീഷ് പ്രധാനമന്ത്രി ബോറിസ് ജോൺസൺ ഇന്ന് ഇന്ത്യൻ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. ഡെൽഹിയിൽ വച്ച് നടക്കുന്ന കൂടിക്കാഴ്ചയിൽ റഷ്യ-യുക്രൈന് യുദ്ധം, റഷ്യയില് നിന്നുള്ള എണ്ണവാങ്ങല്, ഇന്ത്യ-യുകെ സ്വതന്ത്ര വ്യാപാരക്കരാര്, പ്രതിരോധം ഉള്പ്പടെയുള്ള മേഖലകളിലെ ഉഭയകക്ഷി സഹകരണത്തിനായുള്ള രൂപരേഖ എന്നിവ ചർച്ച ചെയ്യും.
ഇന്നലെ രാവിലെയോടെയാണ് ഇന്ത്യ സന്ദർശനത്തിനായി ബോറിസ് ജോൺസൺ അഹമ്മദാബാദിൽ എത്തിയത്. മുഖ്യമന്ത്രി ഭൂപേന്ദ്ര പട്ടേലും ഗവര്ണര് ആചാര്യ ദേവവ്രതും ചേര്ന്നാണ് അദ്ദേഹത്തെ വിമാനത്താവളത്തിൽ സ്വീകരിച്ചത്. രാവിലെ അഹമ്മദാബാദിലെ സബര്മതി ആശ്രമത്തിലും ബോറിസ് ജോണ്സണ് സന്ദര്ശനം നടത്തിയിരുന്നു.
കൂടാതെ ഇന്നലെ അദാനി ഗ്രൂപ്പ് ആസ്ഥാനത്തെത്തിയ അദ്ദേഹം അദാനി ഗ്രൂപ്പ് ചെയര്മാന് ഗൗതം അദാനിയുമായും കൂടിക്കാഴ്ച നടത്തി. ഇന്നലെ ഗുജറാത്തില് തന്നെ തങ്ങിയ ബോറിസ് ജോണ്സണ് സംസ്ഥാനത്തെ നിരവധി ബിസിനസ് തലവന്മാരുമായി ചര്ച്ച നടത്തിയിരുന്നു. ഇന്ന് ഗുജറാത്തിൽ നിന്നും ഡെൽഹിയിൽ എത്തിയ ശേഷമായിരിക്കും നരേന്ദ്ര മോദിയുമായുള്ള കൂടിക്കാഴ്ച നടത്തുക.
Read also: മരിയുപോൾ റഷ്യൻ നിയന്ത്രണത്തിൽ, നിരവധിയാളുകൾ കുടുങ്ങി; സഹായവുമായി അമേരിക്ക