തിരുവനന്തപുരം: പൗരത്വ ഭേദഗതി നിയമം (സിഎഎ) മരവിപ്പിക്കണമെന്ന് ആവശ്യപ്പെട്ട് സുപ്രീം കോടതിയെ സമീപിക്കാൻ മുൻ പ്രതിപക്ഷ നേതാവ് രമേശ് ചെന്നിത്തല. സുപ്രീം കോടതിയിൽ പ്രത്യേക ഹരജി നൽകുമെന്ന് രമേശ് ചെന്നിത്തല അറിയിച്ചു. പൗരത്വ ഭേദഗതിക്കെതിരെ സമർപ്പിച്ച ഹരജിയോടൊപ്പമാണ് പുതിയ ഹരജിയും നൽകുന്നത്.
വർഗീയ ധ്രുവീകരണത്തിനായി രാഷ്ട്രീയ മുതലെടുപ്പിനുള്ള സംഘപരിവാർ ശ്രമം അനുവദിക്കില്ലെന്ന് രമേശ് ചെന്നിത്തല പറഞ്ഞു. സിഎഎ ഭേദഗതി നടപ്പിലാക്കാൻ ഉദ്ദേശിക്കുന്നില്ലെന്ന് സുപ്രീം കോടതിയിൽ സത്യവാങ്മൂലം നൽകിയ അതേ സർക്കാരാണ് തിരഞ്ഞെടുപ്പിന് തൊട്ടു മുൻപ് ചട്ടം പ്രാബല്യത്തിൽ കൊണ്ടുവന്നത്.
മതത്തിന്റെ അടിസ്ഥാനത്തിൽ പൗരത്വം തീരുമാനിക്കുന്നത് അംഗീകരിക്കാനാകില്ല. പൗരത്വം എങ്ങനെ നൽകണമെന്നത് സംബന്ധിച്ച ഭരണഘടനയിലെ ആർട്ടിക്കിൾ അഞ്ചിന് വിരുദ്ധമായ നടപടിയാണിത്. ഭരണഘടനാ ആശയത്തെ നിലനിർത്താൻ ഏതറ്റംവരെയും കോൺഗ്രസും യുഡിഎഫും പോരാടുമെന്നും വിഡി സതീശനും പറഞ്ഞു.
സിഎഎ ചട്ടം നടപ്പിലാക്കാനുള്ള കേന്ദ്ര സർക്കാർ തീരുമാനത്തിനെതിരെ രാജ്യവ്യാപകമായി കോൺഗ്രസ് പ്രക്ഷോഭത്തിലേക്ക് പോവുകയാണ്. കേരളത്തിൽ യുഡിഎഫും കോൺഗ്രസും സംസ്ഥാന വ്യാപകമായി പ്രതിഷേധ പരിപാടികൾ സംഘടിപ്പിച്ചു. യുവജന- വനിതാ സംഘടനകളും സമരമുഖത്ത് ഉണ്ടാകുമെന്നും കോൺഗ്രസ് അറിയിച്ചു.
Most Read| ഗർഭഛിദ്രം ഭരണഘടനാ അവകാശമാക്കി ഫ്രാൻസ്