കൊച്ചി: ഇടപ്പള്ളി ലുലു മാളിൽ യുവനടിയെ അപമാനിച്ച കേസിലെ പ്രതികളെ കുറിച്ച് കൂടുതൽ വിവരങ്ങൾ പുറത്ത് വിട്ട് പോലീസ്. രണ്ട് യുവാക്കളും കൊറിയർ സർവീസുകാരാണ്. ഇവരുടെ കൊച്ചി സന്ദർശനത്തിലും പോലീസിന് സംശയമുണ്ട്. ഇക്കാര്യം കേന്ദ്രീകരിച്ച് അന്വേഷണം പുരോഗമിക്കുകയാണ്.
പ്രതികൾ മങ്കട പോലീസിൽ കീഴടങ്ങുമെന്ന് പറഞ്ഞത് തെറ്റിദ്ധരിപ്പിക്കാൻ ആണെന്നാണ് പോലീസ് നിഗമനം. അവസാന പ്രതികരണത്തിന് ശേഷം രണ്ട് പേരുടെയും മൊബൈൽ ഓഫാണെന്നും സൈബർ സെൽ പറയുന്നു. മലപ്പുറം കടന്നമണ്ണ സ്വദേശികളായ റിൻഷാദ്, ആദിൽ എന്നിവരാണ് കേസിലെ പ്രതികൾ. ഇവരെ അറസ്‌റ്റ് ചെയ്യാൻ കളമശേരി സിഐയും സംഘവും പെരിന്തൽ മണ്ണയിൽ എത്തിയിരുന്നെങ്കിലും ഇന്ന് തന്നെ ഇവർ കീഴടങ്ങുമെന്ന് പ്രതികളുടെ അഭിഭാഷകൻ അറിയിച്ചു.
Also Read: എറണാകുളത്ത് പ്ളാസ്‌റ്റിക് കമ്പനിയിൽ വൻ തീപിടുത്തം
കൊച്ചിയിലെ ലുലു മാളിൽ വ്യാഴാഴ്‌ച വൈകുന്നേരം 7 മണിയോടെയാണ് സംഭവം നടന്നത്. നടിയെ പിന്തുടർന്ന് ശല്യം ചെയ്‌ത യുവാക്കൾ ആളൊഴിഞ്ഞ സ്‌ഥലത്ത്‌ വെച്ച് ശരീരത്തിൽ സ്‌പർശിച്ചുവെന്നും നടി ഫേസ്ബുക്കിൽ കുറിച്ചു. തുടർന്ന് പ്രതിഷേധം ശക്‌തമായതോടെയാണ് പോലീസ് കേസെടുത്തത്. വനിതാ കമ്മീഷനും യുവജന കമ്മീഷനും സ്വമേധയാ കേസെടുത്തിട്ടുണ്ട്.
