കോഴിക്കോട്: നാദാപുരം ചിയ്യൂരിൽ വോട്ടെടുപ്പിനിടെ ഉണ്ടായ സംഘർഷത്തെ തുടർന്ന് 6 യൂത്ത് കോൺഗ്രസ് പ്രവർത്തകരെ പോലീസ് അറസ്‌റ്റ് ചെയ്‌തു. മുഹമ്മദ് ഷഫീഖ്, അബ്‌ദുൽ ലത്തീഫ്, റഹീസ്, ആഷിഖ്, മുഹമ്മദ്, റാഷിദ് എന്നിവരെയാണ് പോലീസ് പിടികൂടിയത്. മൈസൂരിലേക്കുള്ള യാത്രാമധ്യേ വയനാട് പനമരത്ത് വെച്ചാണ് ഇവർ പിടിയിലായത്. വധശ്രമം, പൊതുമുതൽ നശിപ്പിക്കൽ എന്നീ വകുപ്പുകൾ അടക്കം ചുമത്തിയാണ് ഇവർക്കെതിരെ കേസെടുത്തിരിക്കുന്നത്. കണ്ടാലറിയാവുന്ന 50 പേർക്കെതിരെ പോലീസ് ഇന്നലെ കേസെടുത്തിരുന്നു.
ഇന്നലെ ഉച്ചക്ക് 12.30ഓടെയാണ് സംഘർഷം ഉണ്ടായത്. നാദാപുരം തെരുവൻപറമ്പിലെ ചീയൂർ എംഎൽപി സ്‌കൂളിന് മുന്നിൽ കൂട്ടം കൂടി നിന്ന യൂത്ത് കോൺഗ്രസ് പ്രവർത്തകരെ പോലീസ് ഒഴിപ്പിക്കാൻ നോക്കിയതാണ് സംഘർഷത്തിന് കാരണം. പ്രവർത്തകർ പോലീസുകാരെ കയ്യേറ്റം ചെയ്യുകയും രണ്ട് പോലീസ് ജീപ്പുകളുടെ ചില്ലുകൾ തകർക്കുകയും ചെയ്‌തു. തുടർന്ന് കണ്ണീർ വാതകം പ്രയോഗിച്ചാണ് പ്രവർത്തകരെ ഒഴിപ്പിച്ചത്.
Read also: 64 കുപ്പി മദ്യവുമായി ഒരാൾ പിടിയിൽ
