ന്യൂഡെൽഹി: രാജ്യത്ത് കരുതൽ ഡോസ് വാക്‌സിനേഷൻ ഇന്ന് മുതൽ ആരംഭിക്കും. മുൻഗണന വിഭാഗത്തിൽ ഉൾപ്പെടുന്ന കോവിഡ് മുന്നണി പോരാളികൾ, ആരോഗ്യ പ്രവർത്തകർ, അസുഖ ബാധിതരായ 60 വയസിന് മുകളിലുള്ളവർ തുടങ്ങിയവർക്കാണ് ആദ്യഘട്ടത്തിൽ കരുതൽ ഡോസ് വിതരണം ചെയ്യുന്നത്. ഇതിനായുള്ള രജിസ്‌ട്രേഷൻ രാജ്യത്ത് ഇന്നലെ മുതൽ ആരംഭിച്ചിരുന്നു.
കോവിഡ് വാക്‌സിന്റെ രണ്ടും ഡോസും എടുത്ത ശേഷം 9 മാസം പൂർത്തിയാക്കിയവർക്കാണ് കരുതൽ ഡോസെടുക്കാൻ അർഹതയുള്ളത്. ഇവർ കരുതൽ ഡോസിനായി കോവിൻ പോർട്ടലിൽ വീണ്ടും രജിസ്‌റ്റർ ചെയ്യേണ്ട ആവശ്യമില്ല. നേരത്തെ രജിസ്‌റ്റർ ചെയ്‌ത ഫോൺ നമ്പറിൽ നിന്നും ലോഗിൻ ചെയ്‌ത ശേഷം തീയതിയും വാക്‌സിൻ സെന്ററും തിരഞ്ഞെടുത്ത് ബുക്ക് ചെയ്‌താൽ മതിയാകും.
ആദ്യ രണ്ട് ഡോസായി സ്വീകരിച്ച അതേ വാക്‌സിൻ തന്നെയാണ് ബൂസ്‌റ്റർ ഡോസായി നൽകുന്നത്. കരുതൽ ഡോസ് വാക്‌സിനേഷൻ സംബന്ധിച്ച വിശദമായ മാർഗ നിർദ്ദേശങ്ങൾ എല്ലാ സംസ്‌ഥാനങ്ങൾക്കും കേന്ദ്രഭരണ പ്രദേശങ്ങൾക്കും നേരത്തെ തന്നെ നൽകിയിരുന്നു.
Read also: കോവിഡ് വ്യാപനം ഉയരുന്നു; സംസ്‌ഥാനത്ത് ഇന്ന് അവലോകന യോഗം ചേരും
