മലപ്പുറം: ജില്ലയിൽ ഒന്നാം ഡോസ് വാക്സിൻ പോലും സ്വീകരിക്കാതെ ഒരു ലക്ഷത്തിലേറെ പേർ ഉള്ളതായി കണക്കുകൾ. അതേസമയം, രണ്ടാം ഡോസ് വാക്സിൻ സ്വീകരിക്കാത്തവരുടെ എണ്ണം അഞ്ചു ലക്ഷവും ആണ്. സംസ്ഥാനത്ത് കോവിഡ് തരംഗം മൂന്നാം തവണയും പിടിമുറുക്കിയ സാഹചര്യത്തിൽ ജില്ലയിൽ വാക്സിൻ പോലും സ്വീകരിക്കാത്തവരുടെ എണ്ണത്തിലെ വർധനവ് ആരോഗ്യവകുപ്പിനെ പ്രതിസന്ധിയിൽ ആക്കിയിരിക്കുകയാണ്.
പ്രതിരോധത്തിനായി ജില്ല മുഴുവൻ ഒത്തൊരുമിച്ചു പോരാടുന്ന ഘട്ടത്തിൽ വാക്സിൻ എടുക്കാത്തവരുടെ കണക്കുകൾ ശുഭസൂചനയല്ല നൽകുന്നതെന്നാണ് ആരോഗ്യവകുപ്പ് അറിയിക്കുന്നത്. മലപ്പുറത്ത് ഇതുവരെ 34,02,328 പേരാണ് ഒന്നാം ഡോസ് വാക്സിൻ എടുത്തത്. ഒന്നാം ഡോസ് എടുക്കാത്തവരാകട്ടെ 1,01,240 പേരും. രണ്ടു ഡോസും പൂർത്തിയാക്കിയവർ 27,69,485 പേരുള്ളപ്പോൾ, 5,51,783 പേർ ഇനിയും എടുക്കാനുണ്ട്.
വാക്സിൻ സ്വീകരിച്ചതിന് ശേഷം കോവിഡ് പോസിറ്റീവ് ആയവർക്ക് രോഗം ഗുരുതരമാവുകയോ വലിയ ശാരീരിക ബുദ്ധിമുട്ടുകൾ ഉണ്ടാവുകയോ ചെയ്യുന്നില്ല. ഇതാണ് വാക്സിനേഷന്റെ ആവശ്യകത വർധിപ്പിക്കുന്നത്. കൂടാതെ, കോവിഡ് ബാധിച്ച് മരിച്ചവരിൽ 98 ശതമാനം പേരും വാക്സിൻ എടുക്കാത്തവരാണെന്നാണ് റിപ്പോർട്ടുകൾ ചൂണ്ടിക്കാട്ടുന്നത്. മുൻകരുതൽ എന്ന നിലക്ക് എല്ലാവരും എത്രയും പെട്ടെന്ന് വാക്സിൻ സ്വീകരിക്കണമെന്ന് ജില്ലാ ആരോഗ്യവകുപ്പ് നിർദ്ദേശം നൽകി.
Most Read: ഹെലികോപ്ടർ എത്തി; ബാബുവിനെ ഉടൻ താഴെയെത്തിക്കും