ന്യൂഡെൽഹി: ജൂണിൽ കോവിഷീൽഡ്‌ വാക്‌സിന്റെ പത്ത് കോടി ഡോസുകൾ വരെ ഉൽപാദിപ്പിക്കുമെന്ന് സെറം ഇൻസ്‌റ്റിറ്റ്യൂട്ട് ഓഫ് ഇന്ത്യ. കോവിഡ് വാക്‌സിനുകളുടെ ദൗർലഭ്യത്തെ തുടർന്ന് സംസ്‌ഥാനങ്ങളിൽ നിന്ന് പരാതികൾ ഉയരുന്നതിനിടെയാണ് പുതിയ അറിയിപ്പുമായി സെറം അധികൃതർ എത്തിയത്. നിലവിലെ ഉൽപാദന ശേഷി 6.5 കോടിയാണ്. അടുത്ത മാസത്തോടെ ഇത് 10 കോടി ഡോസായി ഉയർത്തുമെന്ന് സെറം വാഗ്‌ദാനം ചെയ്‌തു.
ഇക്കാര്യം വ്യക്‌തമാക്കി കേന്ദ്രമന്ത്രി അമിത് ഷായ്‌ക്ക് സെറം ഇൻസ്‌റ്റിറ്റ്യൂട്ട് കത്തയച്ചിട്ടുണ്ട്. വാക്‌സിൻ വിഷയത്തിൽ ഇന്ത്യയെ സ്വയം പര്യാപ്‌തമാക്കാനുള്ള ശ്രമങ്ങൾക്ക് പിന്തുണ നൽകിയതിന് സെറം ഇൻസ്‌റ്റിറ്റ്യൂട്ട് ഡയറക്‌ടർ (ഗവൺമെന്റ് ആൻഡ് റെഗുലേറ്ററി അഫയേഴ്‌സ്‌) പ്രകാശ് കുമാർ സിങ് അമിത് ഷായ്‌ക്ക് നന്ദി പറഞ്ഞു. രാജ്യത്തെ മുഴുവൻ ജനങ്ങൾക്കും വാക്‌സിൻ ലഭ്യമാക്കാനുള്ള ശ്രമങ്ങളുടെ വിവിധ ഘട്ടങ്ങളിൽ കേന്ദ്ര സർക്കാരിൽ നിന്ന് വലിയ പിന്തുണയാണ് തങ്ങൾക്ക് ലഭിച്ചതെന്നും അദ്ദേഹം കത്തിലൂടെ പറഞ്ഞു.
Also Read: യുപിയിൽ കോവിഡ് ബാധിതന്റെ മൃതദേഹം നദിയിലേക്ക് വലിച്ചെറിഞ്ഞു; ബന്ധുക്കൾക്കെതിരെ കേസ്
