ഭോപ്പാൽ: ഇന്ത്യൻ സമ്പദ് വ്യവസ്ഥയെ ശക്തിപ്പെടുത്താൻ ചാണകത്തിനും ഗോമൂത്രത്തിനും കഴിയുമെന്ന് മധ്യപ്രദേശ് മുഖ്യമന്ത്രിയും ബിജെപി നേതാവുമായ ശിവരാജ് സിംഗ് ചൗഹാൻ. ഇന്ത്യൻ വെറ്ററിനറി അസോസിയേഷന്റെ വനിതാ വിഭാഗം സംഘടിപ്പിച്ച പരിപാടിയിൽ പങ്കെടുത്തുകൊണ്ട് സംസാരിക്കവെയാണ് മുഖ്യമന്ത്രിയുടെ പരാമർശം.
‘പശുക്കളോ കാളകളോ ഉണ്ടെങ്കിൽ മാത്രമേ നമുക്ക് നിരവധി കാര്യങ്ങൾ ചെയ്തു തീർക്കാനാകൂ. അതിനാൽ, അവ ഏറെ പ്രധാനപ്പെട്ടതാണ്. ഗോമൂത്രവും ചാണകവും ഫലപ്രദമായി ഉപയോഗിക്കാൻ ഒരു സംവിധാനമുണ്ടെങ്കിൽ സംസ്ഥാനത്തിന്റെയും രാജ്യത്തിന്റെയാകെയും സമ്പദ് വ്യവസ്ഥയെ ശക്തിപ്പെടുത്താൻ സാധിക്കും’ – ശിവരാജ് സിംഗ് ചൗഹാൻ പറഞ്ഞു.
ഈ മേഖലയിൽ എല്ലാ സഹായവും സർക്കാർ ലഭ്യമാക്കും. സ്ത്രീകൾ മുന്നിട്ടിറങ്ങിയാൽ നമുക്ക് വിജയം കാണാനാകും. ഗോമൂത്രത്തിൽ നിന്നും ചാണകത്തിൽ നിന്നും കീടനാശിനി മുതൽ മരുന്നുകൾ വരെ വൈവിധ്യമാർന്ന നിരവധി ഉൽപ്പന്നങ്ങൾ നിർമിച്ചെടുക്കാനാകും എന്നും ചൗഹാൻ പറഞ്ഞു. കഴിഞ്ഞ വർഷം ആറ് മന്ത്രിമാരെ ഉൾപ്പെടുത്തി പശുക്കൾക്കായി ‘പശു മന്ത്രിസഭ’ രൂപീകരിച്ച സംസ്ഥാനമാണ് മധ്യപ്രദേശ്.
Read also: അസംഗഢിനെ ആര്യംഗഢാക്കി മാറ്റും; യോഗി ആദിത്യനാഥ്