അബുദാബി: ഇത്തിഹാദ് എയർവേഴ്സിന്റെ വേനൽക്കാല ഷെഡ്യൂളുകൾ പ്രഖ്യാപിച്ചു. കേരളം ഉൾപ്പടെ ഇന്ത്യയിലേക്ക് കൂടുതൽ സർവീസുകൾ ഷെഡ്യൂൾ ചെയ്തിട്ടുണ്ട്. തിരുവനന്തപുരത്തേക്കുള്ള പ്രതിദിന സർവീസുകൾ ആഴ്ചയിൽ പത്താക്കി വർധിപ്പിച്ചു. ഇതിന് പുറമെ ജയ്പൂരിലേക്ക് പുതിയ സർവീസും പ്രഖ്യാപിച്ചു.
ഇതോടെ കേരളത്തിലേക്ക് ആഴ്ചയിൽ ആയിരത്തോളം പേർക്കും ജയ്പൂരിലേക്ക് 1200 പേർക്കും അധികമായി സഞ്ചരിക്കാൻ അവസരമൊരുങ്ങി. നിലവിൽ അബുദാബിയിൽ നിന്ന് കൊച്ചിയിലേക്ക് ദിവസേന മൂന്ന് സർവീസുണ്ട്. ജൂൺ 16നാണ് ജയ്പൂരിലേക്ക് പുതിയ സർവീസ് ആരംഭിക്കുന്നത്. തുടക്കത്തിൽ ആഴ്ചയിൽ നാല് സർവീസാണുണ്ടാവുക.
ജയ്പൂർ സർവീസുകൂടി ആരംഭിക്കുന്നതോടെ ഇത്തിഹാദിന്റെ ഇന്ത്യയിലേക്കുള്ള സെക്ടറുകളുടെ എണ്ണം 11 ആയി വർധിക്കും. ഇന്ത്യയിൽ നിന്ന് വിവിധ രാജ്യങ്ങളിലേക്ക് പോകുന്നവർക്ക് അബുദാബി വഴി കണക്ഷൻ വിമാന സർവീസും പ്രയോജനപ്പെടുത്താം. അതേസമയം, ആഴ്ചയിൽ മൂന്ന് വിമാന സർവീസുമായി ജൂൺ 15ന് തുർക്കിയിലേക്കും സർവീസ് ആരംഭിക്കുമെന്നും ഇത്തിഹാദ് പ്രഖ്യാപിച്ചിട്ടുണ്ട്. കൂടാതെ, വിവിധ രാജ്യങ്ങളിലേക്കുള്ള സർവീസുകളുടെ എണ്ണം വർധിപ്പിക്കുകയും ചെയ്തു.
Most Read| മൂന്നുവയസിന് മുൻപേ അന്തർദേശീയ അവാർഡുകൾ കരസ്ഥമാക്കി അഹദ് അയാൻ