കണ്ണൂർ: ലഹരിമരുന്ന് റെയ്ഡിനിടെ ഇളനീർ വിൽപ്പനക്കാരൻ എക്‌സൈസ്‌ ഓഫീസറെ വെട്ടിപ്പരിക്കേൽപിച്ചു. കണ്ണൂർ പാപ്പിനിശ്ശേരി എക്‌സൈസ്‌ സിവിൽ ഓഫീസർ വി നിഷാദിനാണ് (45) വെട്ടേറ്റത്. നിഷാദിനെ വെട്ടിയ ശേഷം ഓടിരക്ഷപ്പെടാൻ ശ്രമിച്ച സി ഷബീറിനെ (36) പോലീസ് അറസ്‌റ്റ് ചെയ്‌തു. ഇയാളിൽ നിന്ന് 25 ഗ്രാം കഞ്ചാവ് പിടിച്ചെടുത്തതായി എക്‌സൈസ്‌ അറിയിച്ചു.
ഇന്നലെ 12.45ന് കെഎസ്‌ടിപി റോഡിൽ യോഗശാലക്ക് സമീപമാണ് സംഭവം. ഇളനീർ വിൽപ്പനക്കിടെ ലഹരിമരുന്ന് വിൽപ്പന നടക്കുന്നുണ്ടെന്ന രഹസ്യവിവരത്തെ തുടർന്ന് കണ്ണൂർ എക്‌സൈസ്‌ സർക്കിൾ, പാപ്പിനിശ്ശേരി എക്‌സൈസ്‌ റേഞ്ച് ഓഫീസിൽ എന്നിവിടങ്ങളിൽ നിന്നുള്ള അന്വേഷണ സംഘം പരിശോധനക്ക് എത്തിയതായിരുന്നു.
ഇളനീർ തൊണ്ടുകളിൽ ഒളിപ്പിച്ച നിലയിലായിരുന്നു കഞ്ചാവ് സൂക്ഷിച്ചിരുന്നത്. ഇവ കണ്ടെത്തിയപ്പോൾ പ്രതി അക്രമാസക്‌തനായി പിറകിൽ നിന്ന് വെട്ടുകയായിരുന്നു. വെട്ടുകത്തി കൊണ്ടുള്ള ആക്രമണത്തിൽ പുറത്ത് ആഴത്തിൽ മുറിവേറ്റ നിഷാദിനെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.
Read also: ജീവനക്കാര്‍ക്ക് കോവിഡ്; തളിപ്പറമ്പ് പോസ്‌റ്റ് ഓഫീസ് അടച്ചു
