തിരുവനന്തപുരം: സാമ്പത്തിക പ്രതിസന്ധിയെ തുടർന്ന് ചിലവ് ചുരുക്കൽ നടപടിയുമായി സംസ്‌ഥാന സർക്കാർ. സർക്കാർ വകുപ്പുകളും, സർക്കാർ ധനസഹായം സ്വീകരിക്കുന്ന സ്‌ഥാപനങ്ങളും സെമിനാർ, ശിൽപ്പശാലകൾ, പരിശീലന പരിപാടികൾ എന്നിവ നടത്താൻ പഞ്ചനക്ഷത്ര സൗകര്യങ്ങൾ ഉപയോഗിക്കുന്നത് ഒഴിവാക്കണമെന്ന് ധനവകുപ്പ് നിർദ്ദേശം നൽകി.
സാമ്പത്തിക പ്രതിസന്ധി നിലനിൽക്കുന്നതിനാൽ ചിലവുകൾ ചുരുക്കണമെന്നാണ് ധനവകുപ്പിന്റെ അറിയിപ്പ്. നിർദ്ദേശം ലംഘിച്ചാൽ ഉദ്യോഗസ്‌ഥരിൽ നിന്ന് പലിശ സഹിതം ചിലവ് തിരികെ പിടിക്കുമെന്നും മുന്നറിയിപ്പ് നൽകി. സർക്കാർ വകുപ്പുകൾ, ഗ്രാന്റ് ഇൻ എയ്‌ഡ്‌ സ്‌ഥാപനങ്ങൾ, തദ്ദേശ സ്‌ഥാപനങ്ങൾ, സർക്കാർ സഹായം കൈപ്പറ്റുന്ന സ്‌ഥാപനങ്ങൾ തുടങ്ങിയവ പരിപാടികൾ സംഘടിപ്പിക്കുമ്പോൾ തങ്ങൾക്ക് കീഴിലുള്ള സംവിധാനം പരമാവധി പ്രയോജനപ്പെടുത്തണം.
നിർദ്ദേശത്തിന് വിരുദ്ധമായി സംഘടിപ്പിക്കുന്ന പരിപാടികളുടെ ചിലവുകൾ, മുൻകൂറുകൾ തിരിച്ചടക്കാൻ കാലതാമസം വരുത്തുന്ന ഉദ്യോഗസ്‌ഥരിൽ നിന്നും പലിശ സഹിതം ചിലവുകൾ തിരിച്ചു പിടിക്കും. ഒഴിവാക്കാൻ പറ്റാത്ത സാഹചര്യങ്ങളിൽ വകുപ്പ് സെക്രട്ടറിക്ക് വ്യവസ്‌ഥയിൽ ഇളവ് അനുവദിക്കാമെന്നും ധനവകുപ്പ് അറിയിച്ചു.
Most Read| ക്രമക്കേട്; വിഎസ്‌എസ്‌സി ഞായറാഴ്‌ച നടത്തിയ റിക്രൂട്ട്മെന്റ്‌ പരീക്ഷ റദ്ദാക്കി
