ന്യൂഡെൽഹി : രാജ്യത്ത് കോവിഡ് വ്യാപനം രൂക്ഷമാകുമ്പോഴും ഇന്ധനവിലയിൽ തുടർച്ചയായ വർധന തുടരുന്നു. കഴിഞ്ഞ 5 ദിവസമായി തുടർച്ചയായി ഉയരുന്ന ഇന്ധനവിലയിൽ മഹാരാഷ്‌ട്രയിലും പെട്രോൾ വില 100 കടന്നു. രാജസ്‌ഥാനും, മധ്യപ്രദേശിനും പുറമെയാണ് ഇപ്പോൾ മഹാരാഷ്‌ട്രയിലും പെട്രോൾ വില 100 കടക്കുന്നത്. ഇന്ന് മഹാരാഷ്‌ട്രയിലെ പര്‍ഭാനിയിലാണ് പെട്രോള്‍ വില 100.20 രൂപയായത്. ഭോപ്പാലില്‍ വില 99.55 രൂപയാണ്.
രാജസ്‌ഥാനിലെ ശ്രീഗംഗാനഗര്‍ ജില്ലയില്‍ പെട്രോൾ വില 102.42 രൂപയും മധ്യപ്രദേശിലെ അനുപ്പൂരില്‍ 102.12 രൂപയുമായിരുന്നു വില. രാജ്യത്ത് രാജസ്‌ഥാനും മധ്യപ്രദേശുമാണ് പെട്രോളിന് രാജ്യത്ത് ഏറ്റവും കൂടുതല്‍ വാറ്റ് ചുമത്തുന്നത്. കൂടാതെ ഡെല്‍ഹിയില്‍ പെട്രോള്‍ ലിറ്ററിന് 91.53 രൂപയും ഡീസല്‍ 82.06 രൂപയുമാണ്.
കേരളത്തിലെ കൊച്ചിയില്‍ പെട്രോള്‍ വില 91.63 രൂപയിലെത്തി. ഡീസല്‍ വില 86.48 രൂപയാണ്. അതേസമയം തിരുവനന്തപുരത്ത് പെട്രോള്‍ വില ലിറ്ററിന് 93.51 രൂപയായും ഡീസല്‍ വില 88.25 രൂപയായും ഉയർന്നു. പെട്രോളിന് 1.14 രൂപയും ഡീസലിന് 1.33 രൂപയുമാണ് കഴിഞ്ഞ ഒരാഴ്‌ചക്കിടെ വര്‍ധിപ്പിച്ചത്.
Read also : ഏഷ്യാനെറ്റ് ന്യൂസുമായി സഹകരിക്കില്ല; ബിജെപി സംസ്‌ഥാന ഘടകം
