തിരുവനന്തപുരം : ഇന്ധനവിലയിൽ തുടർച്ചയായി 12ആം ദിനവും ഉയർച്ച തുടരുന്നു. പെട്രോൾ ലിറ്ററിന് 31 പൈസയും, ഡീസൽ ലിറ്ററിന് 34 പൈസയുമാണ് ഇന്ന് കൂടിയത്. ഇതോടെ സംസ്ഥാനത്ത് ഇന്ധനവില വീണ്ടും കുതിക്കുകയാണ്. നിലവിൽ കൊച്ചിയിൽ പെട്രോളിന് 90.36 രൂപയും ഡീസലിന് 85.05 രൂപയുമാണ് ഇന്നത്തെ വില. കൂടാതെ തിരുവനന്തപുരത്ത് പെട്രോളിന് 92.07 രൂപയും ഡീസലിന് 86. 61 രൂപയുമാണ് വില.
രാജ്യത്ത് ഇന്ധനവില കുതിച്ചുയരുന്നത് സാധാരണക്കാരായ ജനങ്ങളെ വലിയ രീതിയിൽ തന്നെ ബാധിക്കുന്നുണ്ട്. കേരളത്തിൽ 92 രൂപക്ക് മുകളിൽ പെട്രോൾ വിലയെത്തിയപ്പോൾ, രാജ്യത്ത് ഇതിനോടകം തന്നെ പെട്രോൾ വില 100 കടന്ന സംസ്ഥാനങ്ങൾ ഉണ്ട്. പൊതുജനങ്ങൾക്ക് ഇരുട്ടടിയാകുന്ന തരത്തിലാണ് ഇപ്പോൾ പ്രതിദിനം ഇന്ധനവില രാജ്യത്ത് ഉയർന്നുകൊണ്ടിരിക്കുന്നത്.
ഇന്ധനവിലയിൽ ഉണ്ടാകുന്ന ഉയർച്ച മൂലം രാജ്യത്ത് ഭക്ഷ്യവസ്തുക്കൾ ഉൾപ്പടെയുള്ള അവശ്യ സാധനങ്ങളുടെ വില കത്തിക്കയറുകയാണ്. വിരലിലെണ്ണാവുന്ന ദിവസങ്ങൾ കൊണ്ടാണ് മിക്ക ഉൽപ്പന്നങ്ങൾക്കും ഇരട്ടിയിലധികം രൂപയുടെ വർധന ഉണ്ടായിരിക്കുന്നത്. ഇതെല്ലാം പൊതുജനങ്ങളുടെ ദൈനംദിന ജീവിതത്തെ കാര്യമായി തന്നെ ബാധിക്കുന്നുണ്ട്.
Read also : മഹാരാഷ്ട്ര ആരോഗ്യമന്ത്രിക്ക് കോവിഡ്